عه‌لا زه‌كی: ئه‌نجامێن مه د قاره‌مانیا ئیراقێ دا ئاسایه
ئه‌ڤرۆ،
راهێنه‌رێ تیما لاوێن هه‌لبژارتیێ پارێزگه‌ها دهۆكێ بۆ یاریا تێنسا ئه‌ردی دیاركر سه‌رجه‌مێ 12 هه‌لبژارتیێن ئیراقێ تیما وان رێزا پێنجێ د قاره‌مانیا ئیراقێ دا ب ده‌ستڤه ئینایه ئه‌وا دووماهیا حه‌فتیا بوری ل باژێرێ به‌غدا هاتیه ئه‌نجامدان.
زێده‌تر عه‌لا زه‌كی د داخویانیه‌كێ دا بۆ رۆژناما ئه‌ڤرۆ گوت: تیما هه‌لبژارتیێ پارێزگه‌هێ ب سێ یاریزانان پشكداری قاره‌مانیا ئیراقێ بوون و شیان د كۆما خوه دا ده‌ربازبنه قۆناغا پله‌ی ئۆڤ و رێزا پێنجێ بهێن و ب جووداهیا دو خالان ل گه‌ل هه‌لبژارتیێ مووسلێ تووشی خوساره‌تیێ بوون كو رێزا سێیێ ژ ده‌ستدا و ئه‌ڤێ رێزبه‌ندیێ ب ئه‌نجامه‌كێ سروشتی دبینم ژبه‌ركو تیمێن هه‌ڤڕك بهێزتر بوون تایبه‌ت هه‌لبژارتیێن هه‌ولێر و كه‌ربه‌لا.
هه‌روه‌سان ناڤهاتی دیاركر هنده‌ك ئه‌گه‌رێن دی هه‌بوون كو رێزێن پێشیێ ژ ده‌ستدان ئه‌وژی پشككێشانا قاره‌مانیێ تیما مه كه‌فته به‌ر بهێزترین هه‌لبژارتیێن پشكدار ئه‌وێن یاریزانێن هه‌لبژارتیێ ئیراقێ دناڤ رێزێن واندا، لێ دوور ژ ئه‌نجامی ب دیتنا من پشكداریه‌كا سه‌رفه‌راز بوو و یاریزانێن مه مفایه‌كێ باش وه‌رگرت و گوت: هه‌رچه‌نده هیڤیێن مه ئه‌و بوو وه‌كو سه‌ر ئاستێ كچان یاریزانێن هه‌لبژارتیێ پارێزگه‌هێ پلێتا ناڤ رێزێن هه‌لبژارتیێ ئیراقێ وه‌ربگرن و پشكداری قاره‌مانیا نێڤده‌وله‌تی یا سریلانگا بكه‌ن، لێ ئه‌ڤه یاریا تێنسا ئه‌ردی یه گه‌له‌ك كار بۆ دڤێت و گه‌شبینم سالا بهێت دهۆك دێ ل سه‌ر هه‌ردو ئاستا هه‌ڤڕك بیت.
