عه‌لی حسێن: یارییا له‌شجوانیێ ل پارێزگه‌هێ به‌رب پێشڤه دچیت
موسا خالد:
د دیداره‌كێ دا راهێنه‌رێ باژێرێ سێمێلێ و سكرتێرێ فیدراسیۆنا له‌شجۆانیێ ل پارێزگه‌ها دهۆكێ دیار كرهه‌تا نوكه ئه‌ڤێ یاریێ پێشڤه‌چوونه‌كا باش ل پارێزگه‌هێ ب خوه‌ڤه‌گرتییه و شانازیێ ب یاریزانێن خوه دبه‌ین ئه‌وێن ل سه‌ر ئاستێ نێڤده‌وله‌تی پشكداریان دكه‌ن.
زێده‌تر عه‌لی حسێن بۆ رۆژنامه‌یا ئه‌ڤرۆ گۆت: هه‌كه ئه‌ك هه‌لسه‌نگاندنا یارییا له‌شجوانیێ دناڤبه‌را پارێزگه‌ها مه و یێن دی یێن هه‌رێمێ یا مه گه‌له‌ك پێشكه‌فتی تره و ل دووڤ شیانان ئه‌م پشته‌ڤانییا هه‌می یاریزان و راهێنه‌ران دكه‌ین چو ژلایێ مه‌عنه‌وی یان هاریكاریه‌كا دارایی بیت، دیسان ل دووڤ رێنمایان هۆلێن وه‌رزشی دهێنه ڤه‌كرن چه‌ند پیڤه‌ر هه‌نه ژبۆ دانا مۆله‌تا كاری، ژبه‌ر رێكوپێكیێ وبجهئینانا رێنمایان هنده‌ك هۆل دگه‌ل یاریزانێن وان هاتینه خه‌لاتكرن هه‌روه‌سان د ئه‌ڤ ساله دا كێمتر ژ سالێن بۆری باج ژ خودانێن هولا هاتینه وه‌رگرتن.
ژلایه‌كێ دووڤه ناڤهاتی دیار كر هه‌ر ژ زارووكینیا خوه وه‌كو یاریزان ئه‌ڤ یارییه كرییه و چه‌ندین باوه‌رنامه وه‌رگرتینه ل سالا 2001ێ بوویه راهێنه‌ر و گۆت: ل وه‌رزێ 2002ێ پێنگاڤا من یا ئێكێ ل سه‌ر ئاستێ پارێزگه‌هێ رێزا دویێ بده‌ستڤه ئینابوو، دیسان ل سه‌ر ئاستێ ده‌ڤه‌را باكۆرێ ئیراقێ و هه‌رێما كوردستانێ پله‌یا نایاب ده‌ستڤه ئینا، پشكداریێن من ل سه‌ر ئاستێ قاره‌مانیێن مه‌زن یێن ئیراقێ وه‌كو راهێنه‌ر و یاریزان ژ بوویه، هه‌روه‌سان وه‌كو راهێنه‌ر پێنگاڤا من یا ئێكێ دهۆلێن وه‌رزشی یێن باژێرێ سێمێلێ بۆ سالا 2010ێ ڤه‌دگه‌ریت و پێخوه‌شحالم كۆمه‌كا باش یا گه‌نجان من پێگه‌هاندینه، دووڤدا ئه‌ڤه بۆ ماوه‌یێ سێ سالانه وه‌كو سكرتێرێ فیدراسیۆنا له‌شجوانییا پارێزگه‌هێ مه.
عه‌لی حسێنی ئه‌وچه‌نده ژی دیار كر دڤێت گرنگییه‌كا باش بڤێ یاریێ بهێته دان ژبه‌ر مفایێن وێ بۆ له‌ش و ته‌ندرۆستیا هه‌ر كه‌سه‌كی و هه‌می كه‌س پێدڤی ب وه‌رزشێ هه‌نه و گرنگ نینه چ جورێ وه‌رزشێ بیت و گۆت: د نوكه دا ژبه‌ر گرنگییا پێشچاڤ یا ڤێ یاریێ یاریزانێن باش هه‌نه ل پارێزگه‌هێ و چه‌ندین یاریزانێن هه‌نه پشكداریێ ل سه‌ر ئاستێ ئیراقێ و ئاسیا و جیهانێ دكه‌ن و ئه‌ڤه‌ژی جهێ دلخوه‌شیێ یه.
