عه‌مار فه‌رهاد: ده‌ستپێكا سالا بهێت دێ وه‌به‌رهێنانه‌كا باش د یاریگه‌ها زاخۆ دا هێته كرن
عەلی حاجی:
د داخویانیەکێ دا سەرۆکێ یانه‌یا زاخۆ یا وەرزشی بۆ رۆژناما ئەڤرۆ دیار کر د سالا ٢٠٢٤ دا دێ دەست ب کارێ وەبەرهێنانێ کەن و چەند پێنگاڤەک هاڤێژتینە و ئەو چاڤەرێ هاتنا پارێ ته‌رخانكرینه هەتا کو دەست ب کاری بکەن.
زێدەتر عەمار فەرهاد گۆت: ل پروژەیێ سەن ستی وان دو ئاڤاهی هەنە کو دبنه شوقه‌یێن ئاكنجیبوونێ ژبەر هندێ مە رێکەڤتنەک دگەل کۆمپانییا سەن ستی کریە کو ئەو شوققەیە ب وێ کومپانیێ بدەن بەرانبەر کوژمەیەکێ پارەیی و کۆمپانی ل سەر وێ چەندێ رازیببوویه، ئەو رێکەڤتنە ب رەزامەندییا حوکمەتا هەرێما کوردستانێ هاتیە کرن و هەمی کار ب دووماهی هاتینە لەوما ئەم نوکە چاڤەرێنە کۆمپانیا جێبه‌چێكار وی کوژمەیێ پارەیی بۆ یانێ ب چەند قۆناغەکان فرێکەت دا کو ئەم ژی وی پارەیی د بەرژەوەندییا یانێ دا ژ بۆ پروژەیێن وەبەرهێنانێ ب کاربینن، مە نەخشەیەک ئامادەکریە و بۆ حوکمەتا هەرێما کوردستانێ هنارت بوو و ئەو ژی رازی بووینە ل سەر هندێ کو ئەو پروژەیە بهێتە دروست کرن کو پێکهاتیە ژ موتێلەک و مۆلەک و چەند دوکانەکان د ناڤ یاریگەها زاخۆ یا نێڤدەولەتی دا بن.
زێدەتر ناڤبری گۆت ژی: ل دەستپێکا سالا ٢٠٢٤ ئەم دێ دەست ب کارێ خوە یێ وەبەرهێنانێ د ناڤ یاریگەها زاخۆ یا نێڤدەولەتی دا کەین و کارەکێ باش ژی ژ بۆ وان پرۆژەیان هاتینە کرن و ئەم ل وێ باوەرێ دانە کو ئەو پرۆژەیە دێ شێت خزمەتەکا باش بۆ یانه‌یا زاخۆ کەت و ئەم دێ هەمی دەمان بزاڤێ كه‌ین کو پرۆژەیێن وەبەرهێنانێ بۆ یانه‌یا زاخۆ زێدە کەین داکو د پاشەرۆژێ دا خزمەتا یانێ بکەت.
ل دوماهیێ عه‌مار فه‌رهاد گۆت ژی: حوکمەتا هەرێما کوردستانێ پشتەڤانیەکا باش ل یانێ دکەت ژ بۆ پرۆژەیێن وەبەرهێنانێ و هەر دیسان ئیدارەیا سەربەخویا زاخۆ ژی گەلەک هاریکار و پشته‌ڤانه دگەل یانێ دا پێخەمەتی هاڤێژتنا پێنگاڤێن گرنگ ژ بۆ یانێ و پشت به‌ستن ل سه‌ر داهاتیێ خوه بكه‌ت.
