عه‌مید فه‌خری ئه‌حمه‌د: پتریا ئاریشێن نها بووینه خراب بكارئینانا مۆبایلێ و توڕێن جڤاكی
دیدار، رێژین نهێلی:
د دیداره‌كا تایبه‌ت دا بۆ رۆژناما ئه‌ڤرۆ ل دۆر ره‌وشا پارێزگه‌ها دهۆكێ ژ لایێ ئێمناهیێ و دووڤچوونێ و گرنگترین هه‌وێن پۆلیسان، وان دوزه‌یێن ل به‌رده‌ست، كار و چالاكیێن رێڤه‌به‌ریا گشتی یا پۆلیسێن پارێزگه‌ها دهۆكێ. عه‌مید، فه‌خری ئه‌حمه‌د مه‌جید رێڤه‌به‌رێ پۆلیسێن پارێزگه‌ها دهۆكێ گۆت: ئه‌م هه‌موو تیم ب هه‌ڤرا و ب شه‌ڤ و رۆژ د ئه‌ركی داینه ژ بۆ هه‌ر ئاریشه‌كا هه‌بیت هه‌تا یا جڤاكی ژی بیت ئه‌گه‌ر مه نه‌شیا پێكهاتنه‌كێ د ناڤبه‌را وان دروست كه‌ین.
ئه‌م سكالایا وان ره‌وانه‌یی دادگه‌هێ دكه‌ین و مه هه‌میان وه‌ك ده‌زگه‌هێن ئێمناهیێ هه‌ما هه‌نگیه‌كا زوور باش د ناڤبه‌را خوه دا هه‌یه و دیسان ب گشتی خه‌لكێ دهۆكێ ژی ژبیر نه‌كه‌ین گه‌له‌ك یێ هاریكاره د گه‌ل تیمێن مه و هه‌ر وه‌لاتیه‌كێ دهۆكێ خوه وه‌ك پۆلیسه‌كێ به‌رپرسیار دبینیت و مه هه‌ماهه‌نگی و باوه‌ریه‌كا موكم د ناڤبه‌را پۆلیس و وه‌لاتیان دا هه‌یه خوه ئه‌گه‌ر وه‌لاتی گازندا ژی ل مه بكه‌ن یان ده‌ست خوه‌شیا ئاراسته‌یی مه بكه‌ن چونكو خه‌لكێ دهۆك حه‌ز ژ وه‌لات و نیشتیمانێ خوه دكه‌ن، به‌رده‌وام دێ ڤێ باوه‌ریا د ناڤبه‌را خوه دا راگرین.
ل دۆر رولێ كابینا نه‌هێ یا حوكمه‌تا هه‌رێما كوردستانێ ژی د بابه‌تێ ئێمناهیێ دا
عه‌مید فه‌خری گۆت: پره‌نسیپه‌كێ د دونیایێ دا هه‌یی كار پێ دهێته‌كرن كۆ حوكمه‌ت هه‌بیت و وه‌لاتی بهێت دا خزمه‌تا وان بكه‌ن لێ د حوكمه‌تا مه دا و ب تایبه‌ت كابینا نه‌هێ وه‌كریه كو خزمه‌ت بۆ هه‌ر وه‌لاتیه‌كی بچیت ژ لایێ ئێمناهیێ ڤه.
چونكو مه هه‌مییان ڤیایه كاره‌كی بكه‌ین پتر خزمه‌تا خه‌لكێ مه ببیت ب هه‌ر شێوه‌كێ تایبه‌ت ب زێده‌كرنا بنگه‌ها كو پتر ده‌لیڤا كاری ژی هه‌بیت و پتر نێزیكی خه‌لكی بین و كونترۆلا هه‌ر ئاریشه‌كێ بكه‌ین.
ل دۆر زێده‌كرنا بنگه‌ه و جوداكرنا رێڤه‌به‌ریا ب رێڤه‌به‌ریا گشتی یا پۆلیسێن دهۆكێ و دادانا به‌شه‌كێ تایبه‌ت ل كه‌مپا ژی رێڤه‌به‌رێ پۆلیسێن دهۆكێ گۆت: جوداكرن و زێده‌كرنا ڤان بنگه‌ه و به‌شێن پۆلیسی دێ پتر خزمه‌تێ گه‌هیننه خه‌لكی و یا كه‌مپان ژی ژ به‌ر تایبه‌تمه‌ندی و جوداهیا ئاریشا و باشتر خزمه‌تكرنا وان مه ب فه‌ر دیت كو به‌شه‌كێ تایبه‌ت ل وێرێ هه‌بیت، لێ به‌ش و بنگه‌ها جوداهی هه‌یه د گه‌ل رێڤه‌به‌ریا وه‌كی دیار نوكه ئه‌م یێ كار ژبو پروسێسا جوداكرنا رێڤه‌به‌ریا ئاكرێ ژی دكه‌ین و د به‌رده‌وامین و ل دۆر ئه‌گه‌رێ نه‌گرێدانا رێڤه‌به‌ریا ئاكرێ ژی د گه‌ل یا به‌رده‌ره‌ش گۆت: ئه‌ڤه ژ به‌ر وێ یه‌كێ یه كو هه‌تا نوكه ئاكرێ نه‌بوویه ئیداره‌كا سه‌ربه‌خوه ئه‌گه‌ر بۆ ئیداره‌كا سه‌ربه‌خوه دێ ل وی ده‌می قه‌زا ئاكرێ و به‌رده‌ره‌ش ب وێ ئیدارێ ڤه هێنه گرێدان ژ روویێ كارگێری ڤه.
سه‌باره‌ت دیارترین ئاریشه‌یێن نوكه یێن گرێدایی كارێ رێڤه‌به‌ریا پۆلیسان ژی ناڤهاتی گۆت:
ره‌وشا ئارام یا دهۆكێ ب گشتی بۆ مه پالپشتیه كو بێژین ل دهۆكێ ئاریشێن مه‌زن نینن. ژبلی كو ئاریشێن نوكه پتریا وان یێن بووینه خراب بكارئینانا ئامیرێن په‌یوه‌ندیكرنێ، سوشیال میدیایێ، به‌لێ دیسان نه‌بوویه دیارده و هه‌رده‌مێ ئه‌م پێ ئاگه‌دار دبین چاره دكه‌ین به‌ری ئاریشه به‌رفره‌ه بیت و هه‌ردیسان بۆ هشیاریا ڤی بابه‌تی هه‌تا نوكه تیمێن به‌رده‌وام سمینار ل دۆر هشیاریا بكارئینانا مۆبایلێ پێشكێش دكه‌ن ب تایبه‌ت و سوشیالێ و هه‌تا نوكه بۆ پتری 30 قوتابخانه‌یان سمینار هاتینه گۆتیه و به‌رده‌وامین ب سۆپاسی ڤه بۆ كه‌رتێ په‌روه‌ردێ ژی كو هه‌ماهه‌نگ و د هاریكارن بۆ ڤی كارێ مه دا كو ئێدی خه‌لك پتر بزانیت پۆلیس خزمه‌تكاری َوانه نه‌ك دوژمنێ وانه. له‌وما دڤێت هه‌ر سازیه‌ك ل جهێ خوه گرنگیێ ب ته‌خا سنێلا و گه‌نجا بده‌ت چونكو ئه‌و هێز و پاشه‌رۆژا ڤی وه‌لاتی نه و دیسان خێزان گه‌نجێن خوه هشیار بیت و چاڤدێریا كار و ره‌فتارێن وان بكه‌ن دا كو دووری هه‌ر ئاریشه‌كێ بن.
هه‌ردیسان پشتی كو ل ڤی ده‌می چه‌ندین ئامیرێن قومارێ ب شێوه‌كێ به‌رچاف هاتینه ژ كار ئێخستن و ژناڤبرن رێڤه‌به‌رێ پۆلیسێن پارێزگه‌ها دهۆكێ ل دۆر هه‌وا ده‌سته‌سه‌ركرنا ئامیرێن قومارێ ژی گۆت: دیاردا قومارێ دیارده‌كا نه‌شرینه ژ هه‌می لایه‌ن ڤه (ئایینی، یاسایی و ژ لایێ كومه‌لگه‌هێ ژی ڤه كریاره‌كا نه‌فره‌ت لێكری و ره‌ت كریه. له‌وما مه ب ئه‌ك و ب فه‌ر دیت ئه‌ف دیارده نه‌مینیت و به‌ری نوكه ژی كار ل سه‌ر ڤێ چه‌ندێ هاتیه‌كرن و دێ به‌رده‌وام بین و چ جهێن ب ئاشكه‌رایی نه‌ماینه كو قومار لێ بهێته‌كرن و هه‌رجهێ بۆ مه زانیاری ل سه‌ر بهێن یان ئه‌م بزانین بێ گیرۆ بوون دێ ژناڤ به‌ین چونكو ئه‌م بێی زانیاری و به‌لگه ناچینه چ جها ئه‌ڤجا چ برێكا به‌شێ نه‌هێلانا تاوانا ناڤ باژێری بیت یان چالاكیێن مه‌ده‌نی یان ژی هاوارهاتنا ناڤ باژێری و هه‌تا نوكه بۆ ڤێ هه‌وێ، ل دووڤ به‌ندێ یاسایا سزایا ژماره 389 د ئه‌ف ساله دا 137 دوزه ل رێڤه‌به‌ریا مه هاتینه توماركرن و ژماره‌كا زۆر یا ئامیران هاتینه ژناڤبرن كو یێن سالا 2018 هه‌تا 2020 نه و یێن مایین ژی هه‌رده‌مێ فه‌رمانا دادگه‌هێ بۆ مه هات ئه‌و ژی دێ هێنه ژناڤبرن و كه‌س ل سه‌ر یاسایێ نینه هه‌ر جه و كه‌سێ پێ ب زانین دێ رێكاریێن یاسایی د گه‌ل ئه‌نجام ده‌ین خوه ئه‌گه‌ر كی بیت چونكو ئه‌م چ كاره‌كێ بێی یاسا ئه‌نجام ناده‌ین و ب سه‌ر یاسایێ ژی نائێخین.
ده‌رباره‌یی رێگرتن ل تاوانا ئه‌لكترونی ئانكو قومار ب سیسته‌می ژی عه‌مید فه‌خری ئه‌حمه‌د رێڤه‌به‌رێ پۆلیسێن پارێزگه‌ها دهۆكێ گۆت: ئه‌م ب كارێ خوه رادبین و به‌رده‌وام دووڤچوون و چاڤدێریێ دكه‌ین و بزانین كه‌سه‌ك كارتا ژی دفروشیت دێ هێته ده‌سته‌سه‌ركرن.
هه‌ر د به‌رده‌وامیا دیدارا رۆژناما ئه‌ڤرۆ دا و وان هه‌وێن لێگه‌ریان و ده‌سته‌سه‌ركرنێ و ل دۆر كارێ جادوگه‌ریێ (سحر)ێ ژی دیاركر كو ماموستایێن ئایینی ب زحمه‌ت كاره‌كێ وه‌سا بكه‌ن و پشتی ڤان هه‌وان شاندێ وان هاتبوو رێڤه‌به‌ریێ دا كو ده‌ست خوه‌شیێ ل كارێ مه بكه‌ن و ئێك ژ وان ماموستایێن ئایینی پرسیار ژ من كر كا ئایا ئه‌ڤێن ب ڤی كاری رادبن مامۆستایێن ئایینی نه من ژی گۆتێ كو هه‌تا نوكه ئێك مامۆستایێ ئاینی د ناڤ ڤان جادوگه‌را دا نه‌بوویه به‌لكو ئه‌و خوه ب مامۆستایێن ئایینی دده‌نه نیاسین دا كو خه‌لكه‌كی پێ سه‌ر دا ببه‌ن و فێلبازیا لێ بكه‌ن وه‌ك بازرگانیه‌كێ ڤی كاری دبینن و ئه‌نجام دده‌ن. له‌وما هه‌تا نوكه ل دووڤ به‌ندێ یاسایا سزایا ژماره 457 سه‌باره‌ت جادوگه‌ریێ دڤێ هه‌وێ دا 7 دوز ل رێڤه‌به‌ریا مه هاتینه توماركرن.
سه‌باره‌ت كار و دیاردا خازوكیێ ژی عه‌مید فه‌خری گۆت: خازوكی ئێدی یا بوویه تاوانه‌كا رێكخستی و بازرگانیێ ب ره‌حما وه‌لاتیێن مه دكه‌ن بۆ ڤی كاری ژی ئه‌م هه‌ماهه‌نگیێ د گه‌ل رێڤه‌به‌ریا چاڤدێریا جڤاكی دكه‌ین كو كونترۆلا ڤی كاری بكه‌ین و زارۆ و سنێله‌یێن مه دووری ڤان كاران ببن وهه‌تا نوكه ل دووڤ به‌ندێ یاسایا سزایا ژماره 390 ( 339 ) دوز هاتینه توماركرن و ب سۆپاسی ڤه بۆ رولێ رێڤه‌به‌ریا چاڤدێریا جڤاكی.
سه‌باره‌ت ئاڤاهیان ژی و پارچێن عه‌ردی بۆ بنگه‌هێن پۆلیسان دیاركر و گۆت: هه‌تا نوكه 40 پارچه زه‌ڤی ب ناڤێ رێڤه‌به‌ریا پۆلیسێن پارێزگه‌ها دهۆكێ بۆ مه هاتینه ده‌ستنیشانكرن و ل دووڤ جهێن پێدڤی دێ هێنه ئاڤاكرن بۆ نمونه خه‌لكێ قه‌سارا داخواز كریه كو بنگه‌هه‌كێ پۆلیسا ل وێرێ هه‌بیت مه ژی نڤیساره‌ك بۆ وه‌زاره‌تا ناڤخوه‌یی فرێكریه و هه‌ر ده‌مێ به‌رسڤا مه هاته دان دێ ده‌ست ب دروستكرنا وێ كه‌ین.
ده‌رباره‌یی رێنما و سزا و رێكارێن دیاریكری بۆ یانێن شه‌ڤێ ژی رێڤه‌به‌رێ پۆلیسێن پارێزگه‌ها دهۆكێ گۆت: یانه هه‌موو ل دووڤ راسپارده‌یێن رێڤه‌به‌ریا نه‌هێلانا تاوانا كار دكه‌ن و وان زانیاریێـن بۆ داناین ب هه‌ماهه‌نگی د گه‌ل ده‌زگایێن ئه‌منی وه‌ك ئاسایش و زانیاری داینه وان كا ئایا ده‌مژمێر چه‌ند هه‌تا چه‌ند دڤه‌كری بن و سكیوررتی بۆ هه‌بن و یێن ل وان رێكارا ده‌ركه‌ڤن جارا ئێكی َدێ هوشداریێ ده‌نێ و جارا دووڤ دا دێ هێته سزادان و هه‌ردیسان نابیت سنێله بچنه وان جها و نابیت ماددێن بێهوشكه‌ر بهێته بكارئینان و هه‌ردیسان مه ئه‌فسه‌رێ گه‌روك هه‌یه شه‌ڤانه سه‌ره‌دانا وان یانه‌یان دكه‌ت كو دبنه 12 یانه بۆ هندێ هه‌ر خاله‌كا مه به‌حسكری به‌رچاڤ نه‌هێته وه‌رگرتن لێپرسین و سزا بۆ بهێته دانان.
