عیراق دێ بزاڤێ کەت گرێیا وەکھەڤیان ڤەکەت
ئه‌ڤرۆ نيوز:
ھەلبژارتیێ عیراقێ یاریا خوە یا دویێ ژ کوما شەشێ یا ڤاڤارتنێن ھەڤپشک یێن موندیالا جیھانێ یا سالا ٢٠١٨ و کاسا ئاسیا ٢٠١٩ یاریەکا بھێز ل گەل ھەلبژارتیێ تایلەند ئەڤرۆ ل دەمژمێر سیێ ئێڤاری بکەت ل یاریگەھا راجامانگالا ل پایتەختێ تایلەند بانکوک کو عیراق ژ سالا ١٩٧٢ وەرە عیراق نەشیایە سەرکەفتنێ ل سەر تایلەند د یاریگەھا وێ دا تومار بکەت.
د کونگرەکێ رۆژنامەڤانی دا یەحیا علوان راھێنەرێ ھەلبژارتیێ عیراقێ ل دۆر یاریا ئەڤرۆ دیارکر سێ رۆژە شاندێ وان ل باژێرێ بانکوک راھێنانا دکەت خوە بەرھەڤ کرن بۆ یاریا ئەڤرۆ و دێ یاریەکا گەلەک ب زەحمەت بیت بۆ عیراقێ، ژ بەرکو تەپا پێ یا تایلەند ماوەکە پێشکەفتنەکا باش ب خوە ڤە دیتیە، لەورا وان پلانەکا باش بۆ ڤێ یاریێ ل دووڤ شێوازێ یاریا تایلەند دانایە، داکو تووشی چو ئەنجامێن نە چاڤەرێ کری نەبین و بۆ ڤێ یاریێ ژی ھەمی یاریکەر د بەرھەڤن تنێ یاسر قاسم نەبیت ژ بەر چەند ئەگەرێن تایبەت پشکداریێ د ڤێ یاریێ دا ناکەت.
ژلایێ خوە ڤە راھێنەرێ ھەلبژارتیێ تایلەند سیناموانگ بۆ ئاژانسا وەلاتێ خوە دیارکریە دێ ھەمی شیانێن خوە مەزێخن یاریا بەرامبەر عیراقێ سەرکەفتنێ توماربکەن داکو پلێتا کوما شەشێ بەروەخت مسوگەر بکەت بۆ قوناغا دووڤ دا و ئەڤ چەندە دێ ب پشتەڤانیا جەماوەرێ ئامادە ل یاریگەھێ راجامانگالا ھێتە پێش و دێ خوسارەتیا ئێکێ گەھینە عیراقێ د ڤێ یاریێ دا.
دھێتە زانین عیراقێ ژ سالا ١٩٧٢ ل یاریگەھا راجامانگالا ل بانکوکا پایتەختێ تایلەندێ نەشیایە سەرکەفتنێ توماربکەت د سەرجەمێ شەش یاریان دا پێنج جاران وەکھەڤ بویە ل گەل خوسارەتیەکێ.
