عیراق نهشێت ل گهل رهخ و دۆرێن خوه یێن ههرێمى تێكههل ببیت
ب ڤێ سیاسهتا نوكه و ب ڤان پێنگاڤێن نوكه عیراق قووناغێ ل سهر دبڕیت نهشێت تێكهلى جڤاكێ دهولهتى ببیت و دشیاندا نینه تێكهلێێ ل گهل رهخ و دۆرێن خوه یێن ههرێمى دروست بكهت و ههمى بزاڤێن وێ ل پاشهرۆژهكا نێزیك دێ شكهستنێ ئینن و رۆژ یێ د ناڤبهرا مهدا.
سهرپێچیا دهستههلاتا بهغدا ل سهر مافێن رهوایێن گهلێ كورد كو ب درێژیا دیرۆكێ ب دهستڤههاتین و قوربانیێن مهزنێن بۆ هاتینهدان و ب رێككهقتنێن سیاسى كهتوارى و دانپێدایى هاتینه مۆركرن ـ1970، 1991، 2003، 2016 ـ جۆرهكێ زۆرداریێ یه و بازدانه ل سهر ههمى پیڤهرێن رهوشتى و سیستهمێن دیمۆكراتى یێن جیهان ل سهر دچیت و بنپێكرنا ئاسانترین مافێن مرۆڤى یه و ئهڤ رهوشه ل بهر گڤاشتنا ئازادیحوازێن جیهانا سهردهم بهردهوام نابیت و جارهكا دى ههر لایهك دێ گههیته ئاستێ قوربانیدانا خوه و ب مافێن خوه شاد بیت چنكو ب ئاسانى دڤێت بهێته گۆتن كورد عهرهب نینن ههتا جوداهى د ناڤبهرا كوت و دهۆكێ دا یان كهربهلا و ههولێرێدا نهمینیت. جهێ ستراتیژیێ كوردستانێ هاریكاره دوباره ئالۆژیێن نهمانا ئارامیێ تێكبچیت و ئهڤه خزمهتا جڤاكێ دهولهتى ناكهت و جارهكا دى رهوشا ئالۆز ڤهگهرینیته دهڤهرێ و بێى رازیكرنا كوردان چ تیۆرهكا جیۆسیاسى بهرپانابیت و جیهان دوباره دێ پێدڤى ب سهرهدهریا ل گهل كوردان بیت چنكو ب درێژیا سالان بێى كوردان و پشكداركرنا وان ژلایێ سیاسى و برێڤهبرنا دهستههلاتێ ڤه دهڤهر ئارام نهبوویه و ئارام ژى نابیت.
ئهڤ نزیكیا نوكه د ناڤبهرا دهستههلاتا بهغدا و هندهك وهلاتێن ههرێمی دا دهێته دیتن مینا توركیا و عهرهبستانا سعوودى و مسر و ئوردن و هتد.. شیانا بهردهوامبوون و خۆراگریێ نینه، چنكو دهڤهر یا ل همبهر دوچهقبوونا جیهانێ، جیهانا سهردهم ب سهركێشیا ئهمریكا و سونهیێن جیهانێ و لایێ دى یێ شیعهگهرى سهرپهرشتیا وێ دكهت چ رێككهفتنێن دهمكى و بێ میژۆیهكا پێشتر كار بۆ هاتیهكرن نهشێن وان ئالۆزیان ههمیان چارهكهن و عیراق ب سیستهمێ نوكهڤه نهشێت خوه ژ بهرهیێ شیعهگهرى دووربێخیت و نێزیكیهكا راست و دروست ل گهل وان چێكهت و ئهڤ تێكهلیه ههمى دێ بنه بارگرانى ئهگهر هات و كهفتنه همبهر ههلویستێ كاركرنێ، داخوازێن ئیرانێ و بهرهیێ شیعهگهریێ ژلایهكى ڤه و یێن عهرهبستانا سعوودیێ و بهرهیێ ل پشت ژ لایهكێ دیتر ڤه ههڤدژن و وى دهمى ئهڤ رێككهفتن و نزیكى و تێكهلى یه دێ بنه هڵم و ئاشۆپ و د ئاسمانى وهربـن. ههمان دهم ژى ناكۆكیێن شیعهیان ل عیراقێ نههێنه ژبیركرن و ئهو ڤاشتنێن ل سهر دهستههلاتا نوكه ههین تێرا هندێ ناكهن ئهڤ رێككهفتن و ئیمزایه ببنه دوورهێل و ژیهكێ درێژ ببهن.
ب ڤى شێوهیى دێ گههینه دو خالێن زێده گرنگ، ئێك د شیان دا نابیت مافێن رهوایێن گهلێ كورد بكهڤنه بهر مهترسیا ژناڤبرنێ و خهونا سهد سالان یا كوردان ببیته یاریهكا سیاسى دهستههلاتا بهغدا سڤكیێ پێبكهت. یا دى ل كوردستانێ ژى نابیت وهلاتپهروهرى و خوفرۆشى هندا ئهرزان بیت و یارى ب چارهنڤیسێ مرۆڤێ بهێتهكرن، نانێ وهلاتیێ كورد بكهڤیته بهر مهترسیێ، ماف و دراڤ بۆ كیچمهكێ بیت و پترى برسى و رویت و ههژار بمینن، چنكو ل ڤێره مژار مللهت و وهلاته.
