عیسا به‌نستانی: ژبه‌ر هه‌لبه‌سته‌كا من سه‌لام زاخۆیی گه‌له‌ك هاتیه ئێشاندن
ئه‌ڤرۆ، شاكر ئه‌تروشی:
عیسا به‌نستانی، هه‌لبه‌ستڤانێ دیارێ باژێرێ زاخۆ، د دیداره‌كێ دا بۆ په‌رپه‌رێ ئه‌ده‌بی یێ رۆژناما ئه‌ڤرۆ دیاركر كو ل سالا 1967 كو ل وی ده‌می ژیێ وی هه‌ڤده سال بوون حه‌زا نڤیسینا هه‌لبه‌ستێ ل ده‌ف وی په‌یدابوو، له‌ورا ده‌ستپێكر، هه‌تا سالا 1979 حه‌فت هه‌لبه‌ستێن خوه دانه هونه‌رمه‌ندێ نه‌مر (ئه‌رده‌وان زاخۆیی) شه‌ش ژوان ب ده‌نگێ ئه‌رده‌وانی بوونه ستران و سترانا حه‌فتێ نه‌گه‌هشت تۆماربكه‌ت، دووڤدا سترانا (كانی) دا هونه‌رمه‌ند سه‌لام زاخۆیی، پشتی كریه ستران، حكومه‌تا ئیراقێ یا وی سه‌رده‌می سه‌را وێ سترانێ گه‌له‌ك نه‌خۆشی بۆ (سه‌لام)ی چێكرن و هاته ئێشاندن.
ده‌رباره‌یی ڤێ چه‌ندێ هوزانڤان عیسا به‌نستانی گۆت: هه‌لبه‌ستێن من ئه‌وێن هونه‌رمه‌ند ئه‌رده‌وان زاخۆیی كرینه ستران، ئه‌ڤه نه (سینه‌م ژاره، سوارو، دیلان، مالا پركابانی، ئه‌گه‌ر دنیا ده‌ریا بیت، بێ مراد).
هه‌ر وه‌سا عیسا به‌نستانی باس ل هه‌لبه‌ستێن خوه یێن ب ده‌نگێ هونه‌رمه‌ندێن دیتر هاتین گۆتن كر و گۆت: پشتی وی من هه‌لبه‌ست داینه گه‌له‌ك هونه‌رمه‌ند و سترانبێژێن دی، ژوانا (سه‌میر زاخۆیی، عه‌بدولقه‌هار زاخۆیی، عه‌دنان سالح، حاجی زاخۆیی، رێكێش سه‌یرانی، بزاڤ زاخۆیی، بلند ئیبراهیم، هه‌ژار محه‌مه‌د عه‌لی) و گه‌له‌كێن دی.
ئه‌ڤرۆ: ده‌رباره‌یی چاپكرنا په‌رتووكا، ئه‌رێ ته به‌رهه‌مێن چاپكری هه‌نه؟
عیسا: به‌لێ، ل سالا 2011 من سه‌د هه‌لبه‌ستێن خوه د پرتووكه‌كێ دا ل بن ناڤێ (ده‌نگێ چیا) چاپكرن، هه‌روه‌سا پرتووكه‌كا دی ل دۆر خه‌باتا ئێكه‌تیا قوتابیێن كوردستانێ ل زاخۆ ل سالا 1970 هه‌تا 2021
ئه‌ڤرۆ: ئه‌رێ ب چ شێوه تو هوزانێن خۆ ددی سترانبێژان؟ به‌رامبه‌ری وه‌ردگری؟
عیسا به‌نستانی: ئه‌زچو جاران بازارێ فرۆتنا هه‌لبه‌ستان ل گه‌ل چو سترانبێژان ناكه‌م و هه‌موویان ئه‌ز هۆسا دده‌مێ، به‌س هنده‌ك ژوان به‌رامبه‌ر وێ هه‌لبه‌ستێ تشته‌ك وه‌ك دیاری بۆ من هنارتیه.
ئه‌ڤرۆ ئه‌رێ تو په‌یام و ناڤه‌رۆكا هه‌لبه‌ستا خۆ ل دووڤ داخوازیا سترانبێژان دنڤیسی؟
عیسا به‌نستانی: بۆ زانین ژی ئه‌ز چو هه‌لبه‌ستان نانڤیسم هه‌كه په‌یامه‌ك تێدا نه‌بیت و ناڤه‌رۆكا وان ژی هه‌ر ئه‌ز دهه‌لبژێرم، ئانكو ل دووڤ داخوازا سترانبێژان چو هه‌لبه‌ستان كو ئه‌و بۆ من ناڤه‌رۆكێ بێژن نانڤیسم.
ئه‌ڤرۆ: تو ژدایكبوویێ سالا 1950 یه و نوكه خانه‌نشینه ل زاخۆ دژیی، ژبلی هه‌لبه‌ستێ ب چ ڤه مژوولی و ده‌مێ خۆ دبۆرینی؟
عیسا: من دوارێ راگه‌هاندنێ ژی دا كاركریه و بۆ ده‌مێ چه‌ند سالان په‌یامنێرێ (رادیۆیا نه‌وا) بووم، پێنج سالان رێڤه‌به‌رێ رادیۆیا زاخۆ بووم، هه‌روه‌سا من به‌رنامه‌ك ب ناڤێ (دیوانا مامێ عه‌بدال) ل رادیۆیا گه‌نجان هه‌بوو، وی به‌رنامه‌ی گه‌له‌ك ده‌نگڤه‌دا.
ئه‌ڤرۆ: پرۆژه و به‌رهه‌مێن ته یێن داهاتی هه‌نه؟
عیسا: به‌لێ، ژبلی كو من ل گه‌ل نڤیسكار جه‌گه‌رخوین خورشید مه دو پرتووك چاپكرینه، ئه‌و ژی به‌رناسێن كوردستانێ و به‌رناسێن زاخۆ، ئه‌ڤه ده‌مه‌كه ل گه‌ل میدیاكار (شڤان عه‌بدی) مژوولی ئاماده‌كرنا پرتووكه‌كێ نه ل دۆر هه‌ردو هونه‌رمه‌ندان (ئه‌رده‌وان زاخۆیی و ئه‌یاز یوسف) پرتووك د قۆناغێن دووماهیێ دایه و كار یێ ل سه‌ر به‌رده‌وامه، هه‌ر ئه‌ز و شڤان مژوولی چه‌ند پرتووكێن دی نه، ژوانا فۆلكلۆر و كه‌لتۆرێ زاخۆ و به‌رناسێن به‌هدینان یێن ساخ و پشكا دویێ ژ به‌رناسێن كوردستانێ و یێن زاخۆ، كو ئه‌م ب هیڤینه ئیدارا سه‌ربه‌خۆیا زاخۆ پشته‌ڤانیێ ل چاپكرنا وان بكه‌ت، هه‌روه‌سا ل گه‌ل (به‌نستان عسمه‌ت دیتۆ) مژوولی پرتووكه‌كا دی نه ل دۆر هۆزا به‌نستانیان و بابێ وی (عسمه‌ت دینۆ) دێ ب ئه‌ركێ چاپكرنا وێ رابیت.
