عیماد عیسا: هنگاڤتنێ ئەز دووركرم و چاڤەڕێ ڤەگەڕیانا من یا ب هێز بن
د دیدارەكا تایبەت دا گۆلپارێزێ تیما یانەیا زاخۆ دیار كر پشتی تووشی مەزنترین هنگاڤتن بووی دۆبارە یێ هێزا خوە یا جاران و جهێ خوە یێ سەرەكی دگەل تیمێ ڤەدگەڕینت و راهێنەرێ هەلبژارتیێ ئیراقێ ژی دووڤچوونا وی دكەت.
زێدەتر عیماد عیسا بۆ رۆژنامەیا ئەڤرۆ گۆت: ئەو هنگاڤتنا مەزن یا چۆكێ من بوو ئەگەر كارتیكرنێ ل سەر ئاست و كاروانێ من بكەت وەكو گۆلپارێزێ سەرەكی لێ رژدی و ئارمانجێن من یێ مەزن وەكر ئەز خوە بێزار نەكەم، پشتی چارەسەرییا تەندۆرسی ب دووماهی هاتی ب شێوەكێ رێكخستی و بەرنامە دەست ب راهێنانان كرن و هێدی هاتمە دناڤ خولێ دا و د نوكە دا ئەز یێ د قۆناغا باشترنا ئاستێ خوە و ڤەگەڕیان ب هێز، هەرچەندە پشتی هنگاڤتنێ وەكو گۆلپارێزێ سەرەكی نەمابووم د لێ راهێنەرێ هەلبژارتیێ ئیراقێ دووڤچوونا من دكەت بۆ ڤەگەریانێ و د نوكە دا ئەز هزر ڤەگەریانا ئاستێ خوە دكەم دەستپێكێ دگەل یانەیا خوە و دیسان ڤەگەریان بۆ هەلبژارتیێ ئیراقێ.
ل دۆر چوون و ڤەگەریان دناڤبەرا زاخۆ و دهۆكێ دا ناڤهاتی گۆت: چوونا من ژ زاخۆ بۆ دهۆكێ راهێنەرێ بەرێ حەمزە هادی ئەگەر بوو، هەرچەندە ل دهۆكێ كارگێرییا وێ دگەل من باشبوون و كەسانێن سەركەفتی نە، لێ ژبەركو ئەز یێ ئارام نە بووم و من دڤیا زێدەتر رۆلێ خوە بینم، ژبەر حەز و ڤیانێ من زاخۆ هەلبژارت و زێدەتر حەز دكەم دگەل زاخۆ بمینم ب هیڤیمە گەلەك بمینتە لڤێ یانەیا خودان مەزنترین جەماوەر و لڤێ یانێ ئارامم.
عیماد عیسایی ل دۆر ئاستێ گۆلپارێزان ژی گۆت: د وەرزێ ئەڤ سالە دا دیتنا گۆلپارێزان گەلەك باشترە ژ وەرزێن بۆری تایبەت د خولێن ئیراقێ دا دهێنە دیتن، ئەڤە ژی وێ چەندێ دگەهینت ئاستێ گۆلپارێزان و دیتنا وان بەر ب زێدەبوونێ دچیت و ئەڤە ژی نیشانەكا باشە
گۆلپارێزێ یانەیا زاخۆ ئەوچەند دیار كر تیما وان خودان یاریزانێن زیرەكن، ژبەر كو تیمەكا ب یاریزانێن نوو هاتبوو درۆستكرن پێدڤی ب دەمی هەبووین و گۆت: یارییا دگەل هەولێرێ ئەم ڤەگەڕاندینە خولێ و هەڤڕكییان و و هوسا دبینم دێ تیمەكا بزەحمەت بین، ژبەركو ل دەستپێكا مە د خولێ دا یا ب زەحمەت بوو و ئەو یاریێن مە كرین د بەرژوەندیا مە دا نەبوون لێ شارەزاهییا راهێنەری و پشتەڤانییا كارگێریێ یا بەردەوام و جەماوەرێ دلسۆز كو ئێكەمە ل سەر ئاستێ ئیراقێ دێ هێشتا بەرەڤ پێشڤە چین.
