عیماد یونس: من فیدراسیۆنا تایكواندۆیا پارێزگه‌هێ دامه‌زراندییه
موسا خالد:
عیماد یونس وه‌رزشڤانێ یارییا تایكواندۆیێ و خه‌لكێ باژێرێ سێمێلێ و سه‌رۆكێ فیدراسیۆنا پارێزگه‌هێ یا هه‌مان یارییه ل سالا 1991ێ ده‌ست ب وه‌رزشێ كرییه، ل سالا 2000ێ پله‌یا راهێنه‌راتیێ وه‌رگرتییه، پشكداری گه‌له‌ك قاره‌مانیێن ده‌رڤه و نافخۆ بوویه و چه‌ندین ده‌ستكه‌فت ژی ب ده‌ستڤه ئینایینه، ژبۆ زێده‌تر زانیاری ل سه‌ر كار و چالاكی و دیسان بۆچوونا ناڤهاتی رۆژنامه‌یا ئه‌ڤرۆ دیداره‌ك دگه‌ل سازكرییه ئه‌وا بڤی شێوه‌یێ خوارێ بوویه.
ل پێشیێ عیما یونس گۆت: ژبه‌ركو وه‌رزشا تایكواندۆیێ ب ڤیانا من بوو و جوداهییه‌كا تایبه‌ت هه‌بوو ژ وه‌رزشێن دی ژبلی هێزكرنا له‌شی و زانینێ ده‌رۆنێ مرۆڤی ژی بهێزدكه‌ت، دیسان ره‌وشتێ پاك نیشان دده‌ت، له‌وما من هه‌لبژارت و شیام پشكداری زێده‌تر 20 قاره‌مانییان ل وه‌لاتێن جودا بكه‌م و چه‌ندین ده‌ستكه‌فتان بینم و هه‌ر پشكداریه‌كێ ژی ئالایێ كوردستانێ یێ بلندكری و هه‌تا نوكه شیایمه زێده‌تری 300 باوه‌رنامه‌یێن نێڤده‌وله‌تی بۆ راهێنه‌ر و یاریزانێن دهۆكێ په‌یدابكه‌م، هه‌روه‌سان ب شانازی ڤه قاره‌مانێ ئاسیا یا 2010ێ ل ئه‌ندۆنیسیا بووم.
ژلایه‌كێ دووڤه ناڤهاتی ئه‌وچه‌نده گۆت: ل سالا 2000ێ من فیدراسیۆنا تایكواندۆیا پارێزگه‌هێ دامه‌زراندییه لێ ژبه‌ركو یاریزان بووم و پشكداری قاره‌مانیێن ئیراقێ و كوردستانێ دبووم، ڕێك لمن نه هاته‌دان ببمه سه‌رۆكێ فیدراسیۆنێ، هه‌تا 2010ێ ب فه‌رمی من پۆستێ فیدراسیۆنێ وه‌رگرتی، هه‌روه‌سان ل 2007ێ ب فه‌رمی بوومه راهێنه‌رێ نێڤده‌وله‌تی ل كوریا باشۆر پشتی پشكداری چه‌ندین قاره‌مانی و خولێن راهێنانێ و دادڤانیێ یێن ئاسیا و جیهانێ كرین، بۆ پێشكه‌فتنا ڤێ یاریێ ل پارێزگه‌هێ زێده‌تی 100 قاره‌مانی، خولێن راهێنانێ و دادڤانیێ ئه‌نجامداینه و پشتی بویمه سه‌رۆك ژ دو تیمێن بناڤێ تایكواندۆیێ هه‌بوون لێ مه به‌رده‌وام دا خزمه‌تا ڤێ وه‌رزشێ هه‌تا نوكه گه‌هشتیینه 16 تیمێن كوڕان و چار یێن كچان.
عیماد یونس مخابنییا خوه ل سه‌ر نه‌بوونا پشته‌ڤانیێ دیاركر و گۆت: دووماهی قاره‌مانییا نێڤده‌وله‌تی ل كوریا باشۆر پشكداربووم و رێزا سێیێ ب ده‌ستڤه‌ئینا و جهێن په‌یوه‌ندیدار دیاركربوو دێ پشته‌ڤانیا من كه‌ن لێ چ نه‌هاته‌كرن، هیڤی دكه‌م به‌س بیت یان ڤان وەرزشا ئێكلابكەن جوانی رێڤەبەن یان بلا بێژن هەرنه مالێن خۆە دا ئەم ژی ئارامبین بچین بۆ خۆە ل كاره‌كێ دی بگه‌ریێن، بلا بتنێ گرنگیێ ب تەپاپێی نه‌بیت بەلکۆ یاریێن دی ژی هه‌بیت، وه‌رزشێن دی دشێن ئاستەکێ بلند پێشکێشکەن وببنه ستێرێن جیهانی.
