عەبادی: رێ نادەین پەکەکە ل عیراقێ چالاکیا دژی تورکیا ئەنجام بدەت
ئەڤرۆ نيوز، فاتما مزوورى:
سەرۆک وەزیرێن عیراقێ دوھی د پرێس کۆنفرانسەکی دا پشتی ب دووماھی ھاتنا کۆمبوونا جاڤاتا وەزیران راگەھاند، بەغدا ھەماھەنگی ل گەل سوپایێ تورکیا بۆ وان ئۆپەراسیۆن و بۆمبەبارنێن ل سەر پەکەکێ ل ئاخا ھەرێما کوردستانێ نینە، لێ دێ ب دستوورێ عیراقێ پێگیر بن، کو ب چو رەنگەکی رێ نادەت کارەکێ دووژمنکارانە بھێتە ئەنجامدان.
حەیدەر عەبادی گۆت ژی:(رێ ب چو چالاکیێن سەربازی د ناڤ عیراقێ دا نادەین، ب تایبەتی ژ لایێ پارتا کارکەرێن کوردستانێ ڤە، چونکو پارتەکا بیانی یە و عیراقی نینە، د ھەمان دەم دا داخوازێ ژ تورکیا دکەین رێزێ ل سەروەریا عیراقێ بگریت).
ل دۆر ئەنجامێن ھەلبژارتنان، عەبادی گۆت:( ئەوێن سەختەکاری د ھەلبژارتنان دا کرین، دڤێت بھێنە دەستەسەرکرن).
سەبارەت وێ کۆمبوونا بەرفرەە یا د ناڤبەرا لایەنان دا کو ھەڤپەیمانیا نەسر داخوازا ئەنجامدانا وێ یا کری، حەیدەر عەبادی گۆت:( مە دەستپێشخەریەکا نیشتیمانی بۆ ئەنجامدانا دیدارەکا بەرفرەھا نیشتیمانی ب پشکداریا ھەموو کوتلێن سیاسی راگەھاند، ب مەرەما رێککەفتنێ ل سەر بەرنامێ پاشەرۆژێ بۆ برێڤەبرنا دەولەتێ نە ب تنێ حوکمەتێ، دەولەت ژ ھەموو دەستھەلات و دامودەزگەھان پێکدھێت، ئاڤاکرنا دامودەزگەھان پێدڤی ب پێداچوونێ ھەیە، ھەروەسا دانانا بنەما بۆ قۆناغا بھێت، دێ ل بن رۆناھیا دستوور و قانوونێ بیت).
