عەبادی چاكسازیێ و نەهێلانا گەندەلیێ دکەتە بانگەشەیا هەلبژارتنێ
ئەڤرۆ نیۆز ، زنار تۆڤی:
هەر چەندە ماوەیەكە سەرۆك وەزیرێن عێراقێ ب چری ەحس ل دۆسیەیا چاكسازی و روو ب روبوونا گەندەلیێ دکەت، بۆ ڤێ مەبەستێ ژی تیمەکا لێكۆلەران و شارەزایێن نێڤدەولەتی ل بەغدانە، بەلێ تا نوکە هیچ ئەنجامەکێ وێ هەلمەتێ یێ دیار نینە و چاڤدێر دووپات دكەن، عەبادی نەشێت روو ب روو گەندەلكاران ببیت و ئەو هەلمەتا دروستی كری ژی،ب تنێ بۆ سەرنجراکێشانا خەلکێ و هەلمەتا هەلبژارتنایە.
ژێدەرەکێ سیاسی یێ بلند ژ حزبا دەعوە یا ئیسلامی ئاشكرا كریە،کو عەبادی بەردەوام بەحس ل روو ب رووبوونا گەندەلیێ دکەت، بەلێ هیچ چاكسازییەك ب كرداری ناهێتە دیتن و پێنگاڤ بۆ نەهاڤێتینە، ئەو لیستێن بەلاڤ کرین ژی،گەلەک بەری هنگێ هاتینە بەلاڤکرن و یێن نوکە نینن،لەورا ئەو هەلمەتا عەبادی دەست پێ كری بۆ بانگەشەیا هەلبژارتنایە و چو جاران نەشێت چاكسازیێن راستەقینە بکەت.
هەروەسا گوت ژی،ب تنێ نیازێن عەبادی ئەون کو دەنگێن زۆرترین یێن خەلکی پێ كۆم بكەت،ب هیچ شێوەیەكێ گرتنەبەرا رێکاران و ئاراستەكرنا گەندەلكاران ب ئاشكرا و ب ئاگەهداریا گەلێ عێراقێ ئەنجام نادەت، چونكی دۆسیەیا گەندەلیێ زۆر یا هەستیارە و نەشێت ئەنجامێن وێ ل میدیایان بەلاڤ بکەت.
نوکە عێراق ئێكە ژ 10 گەندەلترین وەلات ل سەر ئاستێ دونیایێ و رێژا گەندەلیێ د ئاستەکێ زۆر بەرزدایە، پێشتر راپۆرتێن رۆژنامەڤانی یێن عێراقێ ئاشكرا كرینە،کو تا نوکە پێنج هزار پرۆژێن وەهمی ل عێراقێ هەنە و پارێ خەیالی ل بەرامبەر هاتیە وەرگرتن.
