عەبدولرەزاق سەعید: ب دەستڤە ئینانا ڕێزێن پێشیێ بەلگەیە كو پلانێن مە د سەركەڤتی نە
د داخویانیەكەكا تایبەت دا عەبدولرەزاق سەعید شێخۆ ڕاهێنەرێ تیما یانەیا ئامێدیێ و هەلبژارتیێ ئیراقێ بۆ یارییا كیك بۆكسینگێ دیار كر وەكو تاكە یانەیا پارێزگەها دهۆكێ شیان چار میدالێن رەنگین د قارەمانییا ئیراقێ دا ب دەستڤە بینن پشتی ل رێزێن ئێكێ هەتا سێیێ ل سەر كێشێن خوە یێن جەستەیی بهێت.
زێدەتر ناڤهاتی بۆ رۆژنامەیا ئەڤرۆ گۆت: د دووماهی قارەمانییا ئیراقێ دا ئەوا بەری حەفتییەكێ ل باژێرێ سلێمانیێ هاتییە كرن تێدا 250 یاریزانان ژ 30 یانەیێن جودا یێن ئیراقێ و هەرێما كوردستانێ ل سەر سیستەمێن Full Contact و Low Kick پشكداربوون، چار یاریزانێن مە شیان ڕێزێن پێشیێ بهێن ئەڤچەندە ژی بوویە جهێ دلخوەشیا مە، دیسان وەكو تاكە یانەیا پارێزگەهێ شیان ڕێزێن ئێكێ هەتا سێیێ بهێن ئەڤەژی دەستكەڤتەكە بۆ پارێزگەهێ و یاریزانان، پێنەڤێت ئەڤ ئەنجامە بەلگەیە كو پلانێن مە د سەركەڤتی نە، سەرباری بتنێ مە ب پێنچ یاریزانان پێشكدار كربوون بەرۆڤاژی هندەك یانەیان زێدەتر 10 یاریزانان پشكداربوون و بێ ئەنجام بوون.
ژلایەكێ دووڤە عەبدولرەزاق سەعید گۆت: وەكو یانەیا ئێكانە ل پارێزگەهێ ئەم شیاین ئەڤان ئەنجامان بینن و ئەڤە ژی وێ چەندێ دگەهینیت كو ئەم یێ كارەكێ دروست و پلانێن باش دانین، سۆپاسییا یانەیا ئامێدیێ ژی دكەین دگەل مە هەڤكارن و ئەم ڕژدن ل سەر باشتر و دەستڤەئینانا ئەنجامێن پێشیێ، لێ بۆ هەر پێنگاڤەكێ پێدڤی ب پشتەڤانیێ نە.
بۆ زانین ئەنجامێن یاریزانێن یانەیا ئامێدیێ بڤی شێوەیی بوون، ئەلند عەبدولرەحمان بۆ كێشا گران ڕێزا ئێكێ هات سیستەمێ لۆكیك، ئاماد سەگڤان بۆ كێشا 51 كگم ڕێزا ئێكێ هات سیستەمێ فۆل كۆنتاك. ئەلند نەزیر بۆ كێشا 54 كگم رێزا دویێ هات سیستەمێ لۆكیك و بەهزاد سالح بۆ كێشا 71 كگم رێزا سێیێ هات سیستەمێ لۆكیك.
