عەبدولغەنی شەهەد: شاشیێن كەسۆكی ئەگەرێن خوسارەتیێ بوون و خوە بەرپرسیار دبینم
قەیس وەیس:
تیما فوتبۆلا یانەیا دهۆكێ ژ باژێرێ ناسرییە بێ خال ڤەگەڕیا پشتی تووشی خوسارەتییەكا نەچاڤەڕێ كری بوو بەرانبەر یانەیا ئەلغراف ب چار گۆلان بەرانبەر سێ گۆلان، د یارییا واندا ئەوا ل ئەینییا بۆری ژ چارچووڤەیێ هەڤڕكیێن گەڕا 19ێ و دووماهییا قووناغا ئێكێ یا خولا ستێرێن ئیراقێ یا فوتبۆلێ هاتییە كرن، هەرسێ گۆلێن دهۆكێ ژلایێ یاریزانێن وێ یوسف بن سودە، كەریم دەرویش و پیتەر گۆرگیس ڤە هاتبوونە تۆماركرن.
ڕاهێنەر ئەگەرێن خوسارەتیێ دیاركرن
د كۆنگرەیێ رۆژنامەڤانی یێ پشتی یاریێ دا عەبدولغەنی شەهەد ڕاهێنەرێ یانەیا دهۆكێ ئەگەرێن خوسارەتییا تیما خوە دیاركر و گۆت: هەرچەندە ئاستێ پرانییا یاریزانێن مە گەلەك باش بوو و چەندین دەلیڤەیێن گۆلكرنێ ژ دەستدان، لێ ئەڤە تەپا پێی یە هەر تیمەك دێ هەمی بزاڤان كەت بۆ سەركەڤتنێ، گۆلێن ل سەر مە هاتینە كرن ب خەلەتیێن كەسۆكی بوون، هەرچەندە شاشیێن د ناڤ یاریگەهێ دا پشكەكا یاریێ یە و ئەڤە دپرانییا یارییان دا دهێتە دیتن، ئەز ژی خوە بەرپرسیار دبینم بەرانبەر هەر شاشیەكێ و ئەڤێ خوسارەتیێ.
ژلایەكێ دووڤە ناڤهاتی گۆت: گۆلپارێزێ مە یێ باش نەبوو دڤێ یاریێ دا پێشتر د یاریێن بۆری دا ئەگەرێ سەرەكی یێ سەركەڤتنێ بوویە، دڤێت ئەوان خالێن كێماسی و شاشی چارەسەر بكەین، گازندا من ژ هندەك بڕیارێن دادڤانی و روودانێن دناڤ یاریێ دا پەیدابووین ژ وانا هنگاڤتنا مەزن یا دژی یاریزانێ مە سەفا هادی چێبوویی دڤیابا دادڤانی یاریزانێ غرافە ب كارتا سۆر دوورئێخستبا، بۆ یارییا بهێت دێ كار كەین سەركەڤتنا ڤەگەرینن و قەرەبوویا خالان بكەین.
دو ڕێزا پاشڤەچوو
بڤی ئەنجامی تیما یانەیا دهۆك دو ڕێزا ژ ڕێزبەندییا خولێ پاشڤەچوو و د نوكە دا ب كۆمكرنا 27 خالان ل ڕێزا 11ێ دهێت ژ حەفت سەركەڤتن، شەش وەكهەڤییان، هەروەسان شەش خوسارەتی هەنە، یاریزانێن وێ 22 گۆل تۆماركرینە د بەرانبەر 18 گۆل ل سەر هاتینە تۆمار كرن.
شرۆڤەكارەك ژی شاشیێن گۆلپارێزی دكەتە ئەگەر
ژلایێ خوەڤە زییا جەبار گۆلپارێزێ بەرێ یێ یانەیا دهۆك و شرۆڤەكارێ وەرزشی د خولا ستێرێن ئیراقێ دا گۆت: بەرهەڤییا گۆلپارێزێ دهۆكێ ژلایێ دەرۆنی و تەكنیكی یێ گەلەك یێ خراب بوو، ئەو بەرپرسیارە ژ هەر چار گۆلان ب شێوەیەكێ ئێكسەر، گۆلا ئێكێ شكەستن د لیڤینا خوە ئینا دەمێ تەپەكا سەری هاتییە گۆلێ كو لڤینا وی ل جهەكێ دروست نەبوو كو ڕێك بۆ تۆماركرنا گۆلێ ڤەكربوو، گۆلا دویێ شكەستن د حالەتەكێ تەك یێ هێرشكرنا تیما غراف ل سەر گۆلا وی كو هەڤسەنگییا چەستەیێ خوە ژ دەستدا و بۆچوونا هزری یا خەلەت بوو، هەرچەندە دو گۆلێن دی ژی شاشیێن هێلا بەرەڤانیێ ژی ئەگەر بوون لێ گۆلپارێزێ دهۆكێ ب شێوەیەكێ گشت ژلایێ دەرۆنی و تەكنیكی یێ باش نەبوو.
یاریێن قووناغا دویێ دێ دەستپێكەن
ل دووڤ بڕیارا فدراسیۆنا فوتبۆلا ئیراقێ كو خولا ستێرێن ئیراقێ نا ڕاوەستیێت و چو ناڤبڕ دناڤبەرا هەردو قووناغان دا نابن، پێخەمەت ب دووماهی ئینانا خولێ بەری دەستپێكرنا مۆندیالا جیهانی ئەوا دێ ل دووماهییا خزیرانا ئەڤ سالە هێتە كرن، یاریێن قووناغا ئێكێ كو دبنە گەڕا 20ێ دێ بڤی شێوەیی هێنە كرن,
رۆژا ئەینی ڕێكەڤتی 26- 2- 2026
زاخۆ- ئەلغراف، ل یاریگەها زاخۆ دەمژمێر 9:30 شەڤ هێتە كرن
رۆژا شەمبی 28- 2- 2026
نەفت میسان- تەلەبە، نەهی شەڤ هێتە كرن.
ئەلقاسم- كەرخ، نەهی شەڤێ هێتەكرن
جەوییە- نەجەف، 11:15 شەڤ هێتە كرن.
رۆژا ئێكشەمبی 1-3- 2026
مینا- ئەلگەرمە، ل دەمژمێر نەهی شەڤ هێتە كرن.
ئەمانەت بەغدا- نەفت، ل دەمژمێر نەهی شەڤ.
هەولێر- دیالا، ل دەمژمێر 11:15 شەڤ.
رۆژا دووشەمبی 2-3- 2026
دهۆك- نەورۆز، ل دەمژمێر نەهێ شەڤ.
شورتە- كارەبا، ل دەمژمێر نەهی شەڤ.
زەورا- مووسل، ل دەمژمێر 11:15 شەڤ هێتە كرن.
