عەبدوللا عابد: ڤەكرنا خولان نە بۆ باوەرنامەیانە بەلكو بۆ پێشئێخستنا ئاستێ یارییا فوتبۆلێ یە
شاهۆ فەرید:
د داخویانیەكێ دا عەبدوللا عابد ئەندامێ فێدراسیونا فوتبۆلا پارێزگەها دهۆكێ بۆ رۆژنامەیا ئەڤرۆ دیاركر پشتی ب دووماهی هاتنا خولا ڕاهێنەران بۆ ئاستێ سی ئەوا ب پشكدارییا 24 ڕاهێنەرێن پارێزگەهێ ژ كچ و كوڕان پشكداربووین و بۆ ماوەیێ پازدە رۆژان ب سەرپەرشتیا وانەبێژیێ ئاسیایی وەمیز مونیر گەشبینیەكا بەرچاڤ دناڤ پیشكداران هەبوون دێ شێن بنە خالەكا باش بۆ بلندكرنا ئاستێ خوە و خزمەتا وەرزشا باژێرێن خوە.
هەروەسان گۆت: شێوازێ خولێ تیۆری و پراكتیكی دهاتنە شرۆڤەكرن، پشتی ب دووماهی هاتنا خولێ تاقیكرن بۆ پشكداران هاتنە كرن، دووڤدا باوەرنامەیێن پشكداریێ پێ هاتنە دان لێ دێ چاڤەڕێ ئەنجامێن تاقیكرنێ بین ئەوێن دێ ژلایێ فدراسیۆنا فوتبۆلا ئاسیا ب هەماهنگییا فدراسیۆنا ئیراقێ هێنە پەسەندكرن و سەركەڤتی دێ بنە خودان باوەرنامەیێن ئاستێ سی یا ئاسیایی، هەرچەندە گرنگ نینە ب تنێ دانا باوەرنامەیان بەلكو پێشئێخستنا ئاستێ یاریێ گرنگترە.
ژلایەكێ دووڤە عەبدوللا عابدی ئەوچەندە ژی دیار كر دبیت بوهایێ پشكدارییا خولێ بۆ هندەك ڕاهێنەران گران بیت لێ بوهاكرنا خولێ ددەستێ وان د نینە و گۆت: ژلایێ فێدراسیونا فوتبۆلا ئاسیا دهێتە دەستنیشانكرن و فێدراسیونێن ناڤخوە چ پەیوەندی پێڤە نینە، ئەڤ جورە خولە دێ د بەردەوامبن ل دووڤ داخوازی و حەزا ڕاهێنەرێن مە و مەرەما سەرەكی ژی خزمەتكرنا ڕاهێنەر و یاریزانێن ڤێ یاریێ نە.
ل دووماهیێ ئەندامێ فدراسیۆنا فوتبۆلا پارێزگەهێ گۆت ژی: پێنەڤێت ئێك ژ خالێن سەركەڤتنا هەر كارەكی هەبوونا پشتەڤانییا ڕاگەهاندنێ، لەوما ژی سۆپاسییا ئەوان ڕاگەهاندكاران دكەین یێن پشتەڤان بووین ژ وانا ئەیسەر موستەفا، دیسان رۆژنامەیا ئەڤرۆ و رۆژنامەڤان شاهۆ فەرید و محەمەد عەلی، هەروەسان سۆپاسییا بنگەهێ لاوێن دهۆك و زانكۆیا دهۆك بۆ دابینكرنا هۆلێن خوە و یانەیێن دهۆك، پیرس و چالاكیێن وەرزشی یێن پەروەدەیا دهۆك بۆ دابینكرنا یاریگەهێن خوە.
