عەتارۆكم
سەیفوللا موحەمەد
خاتینا من
ئەز گەڕۆك.. عەتارۆكم
نە زەمبیل فرۆشم
لێ زەمبیلا بملێ منڤە
تژی چانتك و بوخچكن
د چانتكاندا..
شەهێن داری و
كلێ سوبحانی و نەینكن
خشلێن ب بهانە
حجول و بازنن
خزێم و گوهار و ڕستكن
د ناڤ بوخچكاندا..
دەستمال و
شال و قوتكن
پوشی یێن ب ڕویشی و
خفتان و ئێلەكن
وەرە خاتین
بەژنا خوە پێ ب خەملینە
ژبەری كەچكێن گوندی
لێ خڕڤە بن
زەمبیلا من ڤالا بكن
نێ تو دزانی
چەند دگەل تە
چاڤنەبار و هەڤڕكن
وەرە خاتین بازار بكە
بەلكو ب ساناهی
ل سەر بهایان ئەم پێك بكن
ما دێ چەوا
بگر و ڤەكێشا دگەل تە كەم؟!
نێ د زانی دێ بئەرزانی
دگەل تە بێژم
ب بازارێ ئەللاه وەكیل
بتنێ بتنێ..
چەند ماچەكن
د گەلدا..
هندەك لاقردی و
حەنەكن.
