عەشقا من بۆ هونەری رۆژ ب رۆژێ د زێدەبوونێ دایە
دلۆڤان هالۆ:
موسلم ئەحمەد، شێوەكارێ بەرنیاسێ باژێرێ زاخۆ، د دیدارەكێ دا بۆ رۆژناما ئەڤرۆ گۆت: هونەرێ شێوەكاری ل دەف من كارەكێ تاكە كەسی یە و ئەزخۆشیەكا تایبەت ژێ دبینم، چنكو هەموو كەسان شیانێن كاری هونەری ل دەف نینن، هەروەسا جیهانەكا نوویە بۆ من و دەمێ دچمە دناڤ جیهانا رەنگان و بابەتێن جۆرا و جۆر دا خۆشیەكێ بۆ چاڤێن بینەران چێدكەم و من چو جاران نەخۆشی ژ ڤی جۆرێ هونەری نەدیتیە و عەشقا من بۆ هونەری رۆژ بۆ رۆژێ د زێدەبوونێ دایە.
هەروەسا گۆت: دەمێ ئاستەنگەك یان نەخۆشیەك ب سەرێ من دهێت ل وی دەمی كەڤالەكی چێدكەم دا خوە پێ ژبیرڤەكەم و هەكە ئەز شێوەكار نەبام دا دبۆراێ وەرزشی دا كاركەم، بۆ زانین كەڤالێن من دەربڕینێ ژ زۆلم و زۆرداریێ و نەدادپەروەریێ و سرۆشتێ كوردستانێ دكەن و شێوازێ من یێ هونەری یێ تایبەتە ب كەسایەتیا منڤە، هزرێن من كەڤالێن ئاشۆپی نە، بەلێ مفای ژ واقعی وەردگرم، هەموو كەڤالێن من زەیتی نە ل سەر كانفانسی، هەروەسا هەموو رەنگ د كەڤالێن مندا د گرنگن، دەمێ كەڤال دكەڤیتە بەرامبەری من وەكۆ خام من حەزژێكرنەكا زێدە یا بۆ هەی و دەمێ ئەز كەڤالەكی ل دووف حەزا خوە چێدكەم هەروەكو من خوارنەكا خۆش خواری.
