عەلی وەحیددین دێ گرێبەستا كەرمە ئیمزا كەت
قەیس وەیس:
كوڕێ باژێرێ دهۆكێ و راهێنەرێ گەنج عەلی وەحیددین دێ بیتە هاریكارێ راهێنەرێ تیما تەپا پێی یا یانەیا كەرمە یا ئەنباری ئێك ژ یانەیێن نوو ل سالا 2020ێ هاتییە دامەزارندن و د نوكە دا پشكدار د خولا پلا ئێكا ئیراقێ دا.
ل دووڤ ژێدەرێن رۆژنامەڤانی كو هەر ئێك ژ عەلی وەحیددین بوو هاریكارێ راهێنەر حەیدەر مەحمۆد و دیسان راهێنەرێ بەرێ یێ گۆلپارێزێن یانەیا دهۆك كاوە ئیبراهیم دگەل كادرێ نوو ئەركێ راهێنەراتییا گۆلپارێزێن یانەیا كەرمە یا ئەنباری وەرگرت خوە بەرهەڤكرن بۆ وەرزێ نوو یێ خولا پلا ئێكا ئیراقێ و دەربازبوون بۆ پلا نایاب.
ژلایێ خوەڤە عەلی وەحیددین ئەڤ دەنگۆباسە پشتراست كر لێ ب نە فەرمی دانا و بۆ رۆژنامەیا ئەڤرۆ گۆت: ژلایێ راهێنەر حەیدەر مەحمۆد و كارگێرییا یانەیا كەرمە یا باژێرێ فەلۆجە هاتیمە داخوازكرن بۆ وەرگرتنا ئەركێ هاریكارێ راهێنەری، هەرچەندە ل سەر گەلەك خالان ئەم رێككەفتینە و چەند خالەكێن كێم مایینە، لەوما هێش نەبوویە فەرمی و دبیت رۆژێن بهێت دا دیار بیت.
هەروەسان ناڤهاتی گۆت: هەكە بۆ فەرمی وەكو پێنگاڤا ئێكێ و تاقیكرنەكا نوو یا دەرڤەیی پارێزگەهێ بیت، ب هیڤی مە ئەو یا باش بهێتە رێكا مە و هەكە گەهشتینە رێكەفتنێ بشێن ئەو پلان و بەرنامەیێ مە هەیی دگەل راهێنەر حەیدەر مەحمۆد ب سەركەفتیانە بڕێڤەببەین.
