عەلەویێن سووریێ داخوازا سیستەمەکێ فیدرالی دکەن
رێبەرێ ئایینی یێ عەلەویێن سووریێ دیار دکەت، مەترسی ل سەر پێکهاتەیێن ل سووریێ هەیە و دڤێت سیستەمێ نوو یێ سووریێ سیستەمێ فیدرالی بیت و وەکو عەلەویێن سووریێ ئەو دێ بۆ ڤێ یەکێ دەست ب خەباتێ کەن.
شێخ غەزال غەزال رێبەرێ ئایینی یێ عەلەویێن سووریێ دیار کر، سیستەمێ نها یێ سووریێ مەترسیە بۆ هەموو پێکهاتەیان ب تایبەتی ژی بۆ عەلەویان، چونکی د رەوشا نها دا عەلەویان چو هێزێن خوە یێن چەکدار نینن و بەری نها ژی دەستهەلاتا شامێ ب بەهانەیا ئۆپەراسیۆنا ل دژی هێزێن سەر ب بەشار ئەسەدی دەست ب کوشتنا گەلەک عەلەویان کر، نها ژی مەترسی ل سەر عەلەویێن سووریێ هەیە و گۆت: (سیستەمێ نها یێ سووریێ نابیتە بەرسڤ بۆ چارەسەرکرنا پرسێن نها یێن ل سووریێ، دەستهەلاتا نها یا ل شامێ ژی دڤێت ب دارێ زۆرێ سیستەمەک ناڤەندی ئاڤا بکەت، ئەو یەک دێ بیتە ئەگەرێ قەیرانەکا دی یا مەزن ل سووریی، نها ژی سووریێ د قەیرانەکا مەزن دایە و دڤێت هزر بۆ چارەسەریێ بهێتە کرن، لێ مخابن یێن نها ل شامێ هزرا چارەسەریێ ناکەن و هەکە رەوش وەسا بەردەوام بیت دێ سووریێ تووشی شەڕەکێ مەزن یێ ناڤخوەیی بیت).
ناڤهاتی ئەو یەک ژی دیار کر، وەکو عەلەویێن سووریێ ئەو داخوازا سیستەمەک فیدرالی بۆ سووریێ دکەن، هەکە سیستەمێ سووریێ ببیتە فیدرالی دێ هەموو پێکهاتەیێن ئایینی و جڤاکی شێن پێکڤە بژین، هەر کەس دشێت دەڤەرا خوە برێڤە ببەت و ئەو یەک نابیتە ئەگەرێ پارچەکرنا سووریێ ژی، ژ بەر ڤێ یەکێ ژی وەکو عەلەویێن سووریێ ئەو دێ دەست ب چالاکیێن مەدەنی کەن و ئارمانجا وان ژی ئەوە دا جڤاکێ نێڤدەولەتی پشتەڤانیێ ل سیستەمەک فیدرالی بۆ سووریێ بکەت و گۆت: (دڤێت راستیا نها یا ل سووریێ بەرچاڤ وەربگرین، کەس نەشێت ب زۆرێ کوردان، عەلەویان و دورزیان نەچار بکەت ل گەل سیستەمەک ناڤەندی بن، هەموو پێکهاتەیێن ل سووریێ داخوازا مافێن خوە دکەن، ژ بەر ڤێ یەکێ ژی ب ئاڤاکرنا سیستەمەک فیدرالی دێ پڕانیا پرسێن نها یێن ل سووریێ هێنە چارەسەرکرن).
ل ئالیێ دی مەزلوم عەبدی فەرماندارێ گشتی یێ هێزێن سووریا دیموکرات ژی دیار کر، هندەک کەس ل شامێ دخوازن شاشیێن بەرێ دوبارە بکەن، هەر کەس دزانیت ئێدی سەردەمێ ئاڤاکرنا سیستەمەک ناڤەندی ل سووریێ نەمایە، پێکهاتەیێن ل سووریێ ل دژی سیستەمەک ناڤەندی نە، هەکە سیستەمێ نوو یێ سووریێ نە ناڤەندی بیت دێ هەموو پرسێن هەی هێنە چارەسەرکرن و گۆت: (داخواز ژ جڤاکێ نێڤدەولەتی ژی دکەین پشتەڤانیێ ل سووریایەک نە ناڤەندی بکەن، دا وەسا هەموو پێکهاتەیێن ل سووریێ بشێن بگەهنە مافێن خوە، مخابن سیستەمێ ناڤەندی دێ دیسان بیتە ئەگەرێ روودانا قەیرانەکا دی ل سووریێ).
