عەمار محەمەد نوونەرێ پارێزگەهێ یە بۆ قارەمانیا ئاسیا
ئەڤرۆ
یاریزانێ پارێزگەهێ و یانەیا دهۆك بۆ یاریا تەپا مێزێ عەمار محەمەد وەكو وەرزشڤانێ ئێكانە یێ پارێزگەهێ ل سەر ئاستێ لاوان دگەل هەلبژارتیێ ئیراقێ دێ پشكداری قارەمانیا ئاسیا كەن ئەوا بڕیارە هەڤڕكیێن وێ ل تیرمەها بهێت ئیراق مێڤانداریا وێ بكەت، پشتی دگەل هەڤالێن خوە شیایی سەركەفتنێ ل سەر هەر ئێك ژ كوێت، سعۆدیە و ئۆردن بینن دووڤدا د چارگۆشا زێرین دا سەركەڤن ل سەر سۆریا، د یاریا دووماهیێ دا دگەل قەتەر تووشی خوسارەتیێ بوون ب سێ گێمان بێ بەرانبەر، ئەوا شەش هەلبژارتیان پشكداری كرین ژ چارچووڤێ ڤاڤارتنێن دەڤەرا رۆژئاڤا ئاسیا ل سلێمانیێ هاتینە كرن.
ل دۆر ڤێ یەكێ یاریزانێ ناڤهاتی د دیدارەكێ دا بۆ رۆژناما ئەڤرۆ گۆت: كەیفخوەشم وەكو یاریزانەكێ پارێزگەهێ ب گەهمە ئێك ژ مەزنترین قارەمانیێن ئاسیا و ئەڤە ژی ب هەر وەیی نەهاتیە بەلكۆ ب رژدی و پشتەڤانیا ب كۆم دگەل كارگێریا یانە و راهێنەرێ من و زەحمەتا رۆژانە یا راهێنانان، پێنەڤێت ئەركێ من ب سانەهی نابیت لێ هیڤی و ئارمانجێن مەزن هەنە كو بشێم وەكو یاریزانەكێ دهۆكێ و كوردستانێ ناسناڤەكێ ئاسیا ب دەستڤە بینم، لەوما دێ پلان و بەرنامەكێ تایبەت هەبیت دگەل راهێنەرێن خوە یێن یانێ و هەلبژارتیێ ئیراقێ پێخەمەت باشترین شێوە خوە بەرهەڤبكەم و گەشبینم دێ گەهمە ئەوێ خەونا من هەیی.
