عەمەر ئۆرەیی: تیما زاخۆ نموونەیا جوان یا گەنجێن مەیە
عەلی حاجی:
پشتی تیما لاوێن یانه‌یا زاخۆ شیایی بۆ جارا ئێکێ ببنە قارەمانێن خولا نایابا باسکێت بۆلا ئیراقێ، د رێورەسمەکێ تایبەت دا راهێنەر و یاریزانێن تیمێ ژلایێ لقێ هەشت یا پارتی دیموكراتی كوردستان ڤە ل زاخۆ هاتنە خەلاتکرن.
د داخویانیەکێ دا عەمەر ئورەیی بەرپرسێ لقێ هەشت دیار کر بناڤێ مەکتەبا رێکخستنا پارتی ل پارێزگەها دهوکێ و لقێ هەشت ل زاخۆ پیرۆزباهیێن خوە ئاراستەیی یانه‌یا زاخۆ و یاریزان و جەماوەرێ وێ دکەین ب هه‌لكه‌فتا دەستڤە ئینانا ناسناڤێ خولا نایابا ئیراقێ یا باسکێت بۆلێ ل سەر ئاستێ لاوان، باسکتبولا زاخۆ یێ بوویە ناڤەکێ دیار ل سەر ئاستێ هه‌می ئێراقێ و مە باوەرییەکا تەمام ب شیانێن وان یێ باش هەیە کو ئەڤ لاوە دێ شێن دەستکەڤتیێن مەزنتر ب دەستڤە ئینن و دێ بەردەوام ژی پشتەڤانیێ ل یانه‌یێ دکەین، یا گرنگتر ژی ژ ڤی دەستکەڤتی هەبوونا یاریزانێن کورێن زاخۆیە ب کورێن خابیری شیان ڤێ دەستکەڤتی ب دەستخوەڤە بینن، باسکێت بۆلا زاخۆ هەر ژ کەڤندا ناڤەکێ دیار بوو ل سەر ئاستێ ئیراقێ و هەرێما کوردستانێ و پاراستنا ڤی ناڤی ژی ب ساناهی نابیت لێ ئەڤ کارێ دهێتە ئەنجامدان ژ زەحمەتی و ماندیبوونا دەستەیا کارگێریا یانێ و ڕاهێنەر و یاریزانایە، پیرۆزباهیێ ل هەمی خەلکێ زاخۆ و کارگێریا یانێ و ڕاهێنەر و یاریزانێن تیمێ دکەین و ب چاڤەکێ مەزن ژی سەحدکەینە ڤی دەستکەڤتێ گرنگ.
لدور پشتەڤانیا بەردەوام یا لقێ هەشت یا پارتی ل زاخۆ عەمار فەرهاد سەرۆکێ یانه‌یا زاخۆ بۆ رۆژناما ئەڤرۆ گۆت: پشتەڤانیا بەردەوام یا حکومەتا هەرێما کوردستانێ و ئیدارەیا سەربەخویا زاخۆ و لقێ هەشت ل زاخۆ پتر مە هانددەت دەسکەڤتیێن زێدەتر ب دەستڤە بینن و ئاڤاکرنا یاریزانان ژی ژ ڤالاهیەکێ نەهاتیە و کارەکێ مەزن هاتیە کرن و دێ بەردەوام ژی بن ل سەر ئاڤاکرنا یاریزانان ژ زاخۆ ژبەرکو ئەو مەزنترین دەستکەڤتیە بۆ مە كو بشێن دەستکەڤتیەکێ ب ڤی ڕەنگی ب دەستڤە بینن.