غیرەت ئاگـرەكـێ بێ دەنگ یێ ڤـەشارتی یە
مسلح یاسین
هەستەكێ دەرونیێ سروشتی یە ل جەم هەر مرۆڤەكێ د دەمەكێ دا كو تو هەست ب گەفان بكەیی ل بەرامبەر دەست دانا تشتەكێ گرنگ د ژیانێ دا چ ئەو تشت مرۆڤەك بیت یان جهەك بیت یان ڤیان بیت یان گرنگیدان بیت.
ئەڤ گۆتنە ل جەم هەمی مللەتان یا هەی ل جەم مللەتێ مەژی بەربەرلاڤە و زۆر دهێتە گۆتن:
جۆرێن غیرەتێ
غیرەتا دلینی، دەما كەسەك هەست ب گەڤان ژ لایێ كەسەكێ دی و مایتێكرنێ دژیانا وی یا كەسی دا بكەت.
غیرەتا جڤاكێ، تو دێ غیرەتێ ل كەسەكێ راكەی كۆ یێ سەركەڤتیە دپلە و پۆستێن زانستی دا.
غیرەتا خێزانی، دەما دەیك و باب دخێزانێ دا پیتەی پتر ژ كەسەكێ بۆ كەسەكێ دی ددەن.
غیرەت ل ڤێرە نە شك و گۆمانە بەلكی پێداگیریە ل سەر تشتەكێ كۆ مرۆڤ ب بێژیت بۆ مرۆڤی بتنێ یە، هێژاترین گۆتن كو من ل سەر غیرەتێ بهیستی ئەڤە یە، دەما ئوسمانێ كۆڕێ عەفانی خۆدێ ژێ رازی بیت بەرامبەر هەڤژینا خۆ گۆتی:
د دەمەكێ دا د ناڤ نڤینان دا ل بەر مرنێ بودەما بەرێ خۆ دایە سەروچاڤێن هەڤژینا خۆ گۆت:
خەم گران و خەم هەلگرا من ئێشا من زۆرا گرانە لێ دەما دێمێ تە یێ تێكچووی دبینم ئەو بۆ من ژ ئێشا من گرانترە تو پتر من دئێشینی.
غیرەت ئەگەر ب دویربینا ڤیانێ ڤە تەماشە بكەین سیمبۆلا ڤیانا راست و دورستە، د دەمەكی دا ڤیان دبیتە زارۆكەكێ بێگونەه و راستگۆ.
زەلام بۆچی غیرەتێ ژ زەلامی رادكەت چونكی ئەو باش دزانیت كو زەلامێن بێ غیرەت چەند درندە و دپیسن.
هەروەسا دەما رەگەزێ مێ بۆچی بەرامبەر رەگەزێ خۆ غیرەتێ رادكەت، چونكی ئەو دەروونێ ژنێ باش دخوینن ئەو دزانن ئەگەر ژن یا خراب بیت گەلەكا بێ بەختە.
غیرەتێ ژی یاسایێن خۆ هەنە. غیرەت ل ژێر فەرمانا مەژی كارناكەت، چونكی دل د رێ دایە ناهێلیت پشكدار ببیت.
غیرەتا خراب دەربرینی ژ كەربوكین و دل رەشی دكەت دبیت یێ بەرامبەر ب دژواری بدەتە ئێشاندن. ئەگەر پسیار بكەین جوداهی د ناڤبەرا غیرەتێ و حەسویدیێ دا چیە؟ غیرەت: ئەو ترسە ژ دەستدانا وی تشتی یە ئەوێ تە ژ دل ڤیایی و تە هەیی.
حەسویدی ئەوە تو حەزدكەی ئەو خۆشی و ژیانا تەنایا خەلكی بۆ نەمینیت و ژیانا وان بهێتە تێكدان.
ل دوماهیێ من ب فەر دیت چەند رێزەكان ل سەر غیرەتێ بنڤیسم چونكی زۆرا مشەیە د ناڤ تەخ و چینێن جڤاكێ دا. غیرەت هەستەك سروشتی یە د ناخێ هەر تاكەكێ دا بەرجەستە دبیت، بەلێ یا دورست ئەوە مرۆڤ بۆ كارێن باشیێ بكاربینیت و بشێت خۆ كونترۆل بكەت، بۆ خرابیێ نەهێتە بكارئینان، بەلكو ڤایرۆسەك ترسناكە پەیوەندیان تێكددەت و ترس و دودلیێ د ناڤ رێزێن جڤاكی دا پەیدا دكەت ژیانێ ئالۆزتر دكەت و یا باش ئەوە مرۆڤ غیرەتێ بۆ كارێن باش بكاربینیت دا ژیان بەردەوام د گەشێ و وەرار و پێشكەڤتنێ دا بیت.
