فازل فاخر: تیما مە یا ب هێزە و خزینە یا ڤالایە
رەمەزان زەكەریا
د داخۆیانیەكێ دا سەرۆكێ یانەیا شێخان ئاشكرا كر تیما وان یا فوتبۆلێ هەموو دەما ب پلانێن خوە یێن تۆكمە دهاتە ناسین دا كو ببیتە هەڤڕكەكا ب هێز د ناڤ یاریگەهێ دا، ئەڤچەندە هات پشتی تیما وان شیایی ب سەركەڤتنەكا مەزن ل سەر یانەیا مەزن ل سەر كفری بینیت ب پێنچ گۆلان بەرانبەر گۆلەكێ ژ چارچووڤەیێ گەڕا 13ێ یا خولا پلا ئێكا كوردستانێ.
زێدەتر فازل فاخر بۆ رۆژنامەیا ئەڤرۆ گۆت: د نوكە دا یانە د قووناغەكا هەستیار دا دەرباز دبیت، سەرەڕای وان ئاستەنگێن كارگێری و دارایی یێن بەرۆكا یانەیێ گرتین هێشتا بێ هیڤی نینە و ب سەرپەرشتیا راهێنەرەكێ نوو هێزا سەركەفتنێ ڤەگەڕایەڤ ناڤ رێزێن تیمێ، د ناڤبەرا هەردو قووناغێن خولێ دا یانە تووشی لێدانەكا كارگێری بوو هندەك یاریزانێن سەرەكی رێزێن یانەیێ بجهـ هێلان كو ئەڤ چەندە بووە ئەگەرێ تێكچوونا هەڤسەنگیێ و نە دەستڤە ئینانا ئەنجامێن باش د چەند یاریێن دەربازبوویی دا، د گەلەك یاریان دا شێخان ئاستەكێ نایاب پێشكێش دكر لێ نەبوونا چەنسی د گۆلكرنێ دا و هندەك شاشیێن بەرگریێ و بڕیارێن نەدادپەروەرانە یێن دادڤانان بوونە رێگر ل هەمبەر سەركەفتنێن یانەیێ.
ناڤبری گۆتژی: پشتی دەستبكاربوونا ڕاهێنەرەكێ نوو تیما مە ب هێرشێن هێز و مۆرالەكا نوو كەفتیە ناڤ یاریەگەهێ دا د سێ یاریان دا ل گەل یانەیا شێخان سەرپەرشتی كریە و ئەنجام باشبوون بەرامبەر یانەیا زانكۆیا جیهان ئاستەكێ بەرز و وەكهەڤبوونەكا ب هێز هەبوو، بەرامبەر یانەیا شەقلاوە یاریەكا قارەمانانە لێ مخابن د خۆلەكا دووماهیێ دا گۆلەك ل سەر هاتە تۆماركرن بۆ ئەگەرێ خساربوونێ، بەرامبەر یانەیا كفری وەرچەرخانەكا مەزن ب سەركەفتنەكا مێژوویی (5-1) كو بووە نیشانەیا زڤڕینا شێخان بۆ سەر رێكا دروست.
فازل فاخر خۆیاكر: ل پشت بزاڤێن وەرزشی راستیەكا تال هەیە كو یانە د تەنگاڤیەكا دژوارا ئابووری دایە كارگێریا یانەیێ هەتا نوكە د بن بارێ دەینێن یاریزانان دایە، چاڤێن جەماوەر و كارگێریا یانەیێ ل ئیدارەیا شێخان و پارێزگەها دهۆكێ نە كو د هەوارا یانەیێ بهێن بۆ مانەڤە د خولا پلە ئێك دا پشتەڤانیەكا بلەز و خەمخۆرانە پێشكەشی یانەیێ بكەن ژبەركو زەحمەتا سالەكێ یا یاریزان و راهێنەران د مەترسیێ دایە ئەگەر هاریكاریێن دارایی نەگەهن شێخان بشێت وەك هێزەكا دیار د وەرزشا دەڤەرێ دا بمینیتەڤە.
