فایزا جه‌لال: سالا بهێت دێ دووباره به‌رگریێ ژ گۆلا ئافره‌تێن دهۆكێ كه‌م
زنار زوبێر:
گۆلپارێزا خودان شیان یا یانا ئافره‌تێن دهۆكێ دیاركر سالا بهێت دێ دووباره به‌رگریێ ژ گۆلا تیما خوه یا فۆتسالێ كه‌ت و خواست بۆ وه‌رزێ بهێت ژی بشێن پشكداری خولا ئیراقێ ژی بكه‌ن دیسان هه‌ڤژینێ وێ ژی نه‌بوویه رێگر هه‌مبه‌ر كاروانێ وێ یێ وه‌رزشی.
زێده‌تر فایزا جه‌لال د دیداره‌كێ دا بۆ رۆژناما ئه‌ڤرۆ گۆت: خوشترین كاروانێ من یێ ژیانا وه‌رزشی وه‌رزێ چووی بوو ژبه‌ركو بۆ جارا ئێكێ وه‌كو یاریزانه‌ك شیاین ناسناڤێ خولا كوردستانێ ل گه‌ل یانا خوه ئافره‌تێن دهۆكێ ده‌ستڤه بینین و بۆ سالا بهێت ژی دێ گرێبه‌ستا خوه نووكه‌م و به‌رگریێ ژ تورا یانا ئافره‌تێن دهۆكێ كه‌م پێخه‌مه‌ت ده‌ستڤه‌ئینانا ناسناڤێن زێده‌تر.
گۆلپارێزا نافهاتی خواست ل سالا بهێت یانا ئافره‌تێن دهۆك پشكداریێ د خولا فۆتسالا ئیراقێ ژی دا بكه‌ت ژبه‌ركو ژلایێ هه‌ڤڕكیێ ڤه ژ خولا كوردستانێ یا فۆتسالا كچان بهێزتره و پشتبه‌ستنا یانێن ئیراقێ ل سه‌ر كچێن كوردستانێ یه باشترین گروڤه ل سه‌ر ڤێ چه‌ندێ چونا هه‌موو یاریزانێن سه‌ره‌كی یێن یان ئافره‌تێن دهۆكێ بۆ یانێن جه‌ویه و غازا شیمال و ئه‌ڤ هه‌ردو یانه بهێزا ئافره‌تێن دهۆكێ شیان رێزێن ئێكێ و دویێ ده‌ستخوه‌ڤه بینن.
ل دووماهیێ فایزایێ گۆت: سه‌ره‌رای خودان خێزانم لێ ئه‌ڤ چه‌نده نه‌بوویه رێگر هه‌مبه‌ری كاروانێ من یێ وه‌رزشی كو ل پاشه‌رۆژێ ژی دخوازم د بیاڤێن كارگێری ژی دا به‌رده‌وام بم ل سه‌ر وه‌رزشێ.
