فایل ب دروستی ژ كۆمپیۆته‌ری دهێنه دیلێتكرن؟
ته‌كنولۆژیا:
تشتێ هاته بلندكرن بۆ ناڤێ ئه‌نترنێتێ بۆ هه‌تا هه‌تایێ دمینیته تیدا. ل ڤان سالێن دووماهیێ مه ئه‌ڤ رسته یان چه‌ند رسته‌كێن وه‌كو ڤێ یێن گوهـ لێ بووین. هه‌ر ئه‌ڤه یه ژی بۆ مه پیچه‌كا دلته‌نگیێ دروست دكه‌ت، به‌لێ ژیوار ژی ئه‌ڤه‌یه. دیلێتكرنا داتایان ل سه‌ر تۆڕا ئه‌نترنێتێ وه‌كو دیلێتكرنا ژمارا و ئه‌پلیكه‌یشنا نینه، داتا دمینن و گرێدایی سیسته‌مێ داتایا و رێكارێن وانن.
هه‌رده‌مه‌كا تو رازی دبی ل سه‌ر سیاسه‌تا كاركرنێ ئه‌ڤه تو ب زانین یان ژی بێ زانینا خوه رازی دبی رێ بده‌یی هه‌موو داتایێن ته بهێنه هه‌لگرتن، هنده‌ك جاران دهێنه فرۆتن ژی ب لایه‌نێ سیێ. ژ وان ژی ناڤێ ته و جهێ ته و ئیمێل و ژمارا تله‌فۆنێ و ئای پی و جهێ ته و لێگه‌ر و تۆمارا كین و تشتی ته بڤێت. ئه‌ڤه ژی تشته‌كێ گه‌له‌ك ب بهایه بۆ گه‌له‌ك ژ كۆمپانیێن كارێ ریكلامان دكه‌ن و هه‌تا هاككه‌ران ژی.
ئاریشه ل ڤێره ئه‌وه كو گه‌له‌ك ژ ڤان كۆمپانیان پێزانینێن ته دفرۆشنه كه‌سانێن دی بێی تو بزانی یا ده‌ستووریێ ژ ته وه‌ربگرن، دبێژنێ (بكرێن داتایان). ئه‌وێن پاره‌یه‌كێ ئێكجار زوور د ڤی واری دا دمه‌زێخن و د وارێن لێگه‌ران و ژڤان و ریكلام و گه‌له‌ك كارێن دی بكاردئینن. هنده‌ك جاران ژی دبیت بكه‌ڤنه ده‌ستێ هاككه‌ر و خرابكاران.
نها هزره‌ك هه‌یه كار ل سه‌ر وێ چه‌ندێ دكه‌ت كو داتایێن ته دیلێت بكه‌ن و ل ده‌ف چو كۆمپانیا نه‌مینن هه‌روه‌كو تابلۆیا ئێكه‌تیا ئورۆپی یا پاراستنا داتایان داخواز دكه‌ت كو داتایێن كه‌سی ل كۆمپانیان نه‌هێنه هه‌لگرتن. ئه‌ڤه ژی كاره‌كێ گه‌له‌ك ب زه‌حمه‌ته ژ وان هه‌موو كۆمپانیان بهێنه هه‌لگرتن یێن ته داتایێن خوه داینێ، به‌لێ دشیان دایه هنده‌ك جهێن تو هه‌لبژێری ئه‌و داتا ل وێرێ نه‌مینن.
ل ڤێره هنده‌ك مالپه‌ر هه‌نه كو به‌رامبه‌ر كوژمه‌كێ پاره‌یی رێگریێ ل وێ چه‌ندێ دكه‌ن كو داتایێن ته روو ب روویێ زیانێ ببن و داخوازێ ژ لایه‌نێ به‌رامبه‌ر دكه‌ت كو داتایێن ته نه‌هێلنه ل ده‌ف خوه و دووڤچوونا بابه‌تی ژی دكه‌ن دا كو یێ پاراستی بی ژ وان ژی به‌رنامێ Incogni یێ تایبه‌ت ب ڤی كاری ڤه.
به‌لێ هه‌تا ئه‌ڤ به‌رنامه ژی نابنه گرنتیه‌كا پشت راستكری، هنده‌ك پێزانین یێن هه‌ین ناهێنه دیلێتكرن ب ئێكجاری، مالپه‌رێن تورێن جڤاكی رێ ناده‌ت تۆمارێن ته ب ئێكجاری بهێنه دیلێتكرن و ئه‌ڤه ل سه‌ر گه‌له‌ك جهێن دژی د گۆنجیت كو خودانێن هه‌مان سیاسه‌تن.
له‌ورا ل دووماهیێ دێ بێژین باشترین رێ بۆ چاره‌كرنا ڤی بابه‌تی خوه پاراستنه، هه‌ر ده‌ما ته ڤیا خوه د مالپه‌ره‌كی دا تۆمار بكه‌یی دووجاركی هزر بكه و ل به‌ر تایبه‌تمه‌ندیێن خوه ژی یێ راوه‌ستیایی به.
هه‌كه ته كاره‌كێ ژ ڤی ره‌نگی كربیت ژی و یێ په‌شیمان بی، دشیان دایه سه‌ره‌دانا مالپه‌رێ MyDataRequest دێ هه‌تا راده‌كی شێی به‌رسینگێ ڤی كاری گری، به‌لێ هه‌ر وه‌كو پێدڤی و ب ته‌مامی ئه‌ڤ كاره ناهێته ئه‌نجامدان. ئانكو هه‌ر ب ته‌مامی هه‌می تشت ناهێنه دیلێتكرن.
