فدراسیۆنا فوتبۆلا ئیراقێ: ئێدی خول نا هێتە ڕاوەستاندن
قەیس وەیس:
ب شێوەیەكێ فەرمی فدراسیۆنا فوتبۆلا ئیراقێ هەموو یانەیێن پشكدار د خولا ستێر و پلا نایاب دا ئاگەهدار كرن كو پاشئێخستن د چو یارییان مایی ژ هەڤڕكیێن وان دا نا هێتە كرن و ئەو دەنگۆیێ پاشئێخستنا چەند یارییان هاتە ڕەدكر ئەوا پێشبینی بوو د دەمێ پشكدارییا هەلبژارتیێ ئیراقێ د كۆپا كەنداڤی یا26ێ دا بكەت كو بڕیارە هەڤڕكیێن وێ ل 21ێ ڤێ مەهێ وەلاتێ كوەیت مێڤاندارییا وێ بكەت.
د نڤێسارا خوە یا فەرمی دا هاتییە كو فدراسیۆنێ بڕیار دایە د دەمێ ئەنجامدانا كۆپا كەنداڤی ل سەر ئاستێ هەلبژارتییان و پشكدارییا ئیراقێ دڤێ قارەمانیێ دا هەڤڕكیێن خولا ستێرێن ئیراقێ دێ دبەردەوامبن و هێچ گوهۆڕینەك یا پاشئێخستنا چ یارییان نا هێتە كرن پێخەمەت خول یا بەردەوامبیت و چ كارتیكرن ل سەر هەڤڕكی و سەنگ و هێزا وێ نە هێتە كرن.
د هەمان نڤێسارا فەرمی دا هاتییە كو بڕیار هاتییە دان وەكو هەڤسەنگیەك ئەو یاریزانێن دهێنە گازیكرن زێدەتر ژ دو یاریزانان نەبن یێن هەر یانەكێ ئەڤچەندە ژی دا كارتیكرنێ ل سەر ئاستێ خولێ و یانەیێ نەكەت و هیچ ڕەنگەكی قەبوول ناكەن خول بهێتە ڕاوەستاندن و ب پڕانییا ڕازیبوونا یانەیێن پشكدار، لەوما ژی هەموو یانە بۆ یاریێن خولێ بەرهەڤبن و چ گرنگی ب گۆتگۆتان نە هێتە دان.
ل دووڤ ژێدەرێن باوەرپێكری ژ یانەیا دهۆكێ یاریزان پیتەر گۆگیس و یانەیا زاخۆ ئەمجەد عتوان و گۆلپارێز عەلی كازم دناڤ لیستەیا هەلبژارتیێ ئیراقێ دانە و دبیت ئەڤ رێژە زێدەتر لێبهێت.
