فراكسیۆنا پارتی: مە رازیبوون بۆ ب دەهان پڕۆژەیان ل دەڤەرێن كوردستانی وەرگرتیە
زنار تۆڤی:
سەرۆكێ لژنا هەرێم و پارێزگەهان ل پەرلەمانێ ئیراقێ دیار كر، فراكسیۆنا پارتی ل پەرلەمانێ ئیراقێ ب هاریكارییا مەكتەبا رێكخستنا پارتی ل نەینەوا و نوونەرێن پارتی ل جڤاتا پارێزگەهێ و ئیدارا خۆجهیا مووسلێ، رازیبوون بۆ ئەنجامدانا ب دەهان پڕۆژەیان وەرگرتییە و گەلەك ژ وان پڕۆژەیان نوكە د قووناغا بجهئینانێ دانە.
شێروان دوبەردانی، سەرۆكێ لژنا هەرێم و پارێزگەهان بۆ رۆژناما ئەڤرۆ گۆت: «ئەو پڕۆژە ل دەڤەرێن كوردستانی یێن سنوورێ پارێزگەها نەینەوا دێ هێنە بجهئینان، پێك دهێن ژ پڕۆژەیێن رێكێن سەرەكی و رێكێن ناڤخۆیی و پڕۆژەیێ ئاڤێ و كارەبێ و بنگەهێ ساخلەمیێ و د هەموو بیاڤێن دی یێن خزمەتگوزاری دانە، ئەوا پێدڤی بیت دێ بۆ وان هێتە ئەنجامدان».
ناڤهات گۆتژی: «ئەڤ پڕۆژە ب بزاڤێن مە ل پەرلەمانێ ئیراقێ و ل جڤاتا پارێزگەهێ و ئیدارا پارێزگەها نەینەوا بووینە و دێ بەردەوام بین، هەر جهەكێ پێدڤی بكەت، دێ كاری بۆ ئەنجامدانا پڕۆژەیان كەین، چونكی ئەم نوونەرێن خەلكینە و پێدڤییە خزمەتا خەلكی بكەین، هەروەسا چەندین نەخۆشخانە دێ هێنە دروستكرن، وەكو نەخۆشخانەیا زوممار و فایدە و شێخان و مەخموور و گوێڕ و رازیبوون بۆ پرانییا وان تەمام بوویە و هندەك بودجە ژی بۆ هاتیە تەرخانكرن، نۆشدار و كارمەندێن ساخلەمییێ ژی بۆ وان نەخۆشخانەیان دێ هێنە دابینكرن، هندەك ژ وان نەخۆشخانەیان 100 تەختە نە و هندەك ژی 50 تەختی نە».
