فریشته‌كا چیایێ شنگالێ
رێبه‌ر ره‌مه‌زان عیسا
ئه‌و كچا…
د زارۆكیا خوه دا
بوویه بووك و
نزانیت…
ئه‌و كچا…
ل هه‌موو سحاریان
ل كولانێن وارگه‌هێ خوه
د ناڤ هه‌ڤالان دا
د ناڤ یاریان دا
ژ بیر ڤه دچیت و
هێشتا نزانیت،
ئه‌ڤرۆ …
دێ بیته بووك
د ئاشۆپا وێ دا
ئه‌ڤرۆ….
وه‌كو دوهی یه
هه‌ر دێ زارۆك بیت و
نه‌دزانی یا ل به‌ر بازاری.
ئه‌ڤرۆ…
د ناڤ بازار و
قه‌فه‌سان دا..
ب گرێدایی و دێم پێچایی
د ناڤ بازارێ زێده‌كرن و كێمكرنێ دا
دگرنژیت…
ب گرنژینه‌كا ب چاڤ گری
د خه‌یالا وێ دا
بازارێ كڕینا پێلستۆكانه
د خه‌یالا وێ دا
بازار گه‌رمكرنه
بۆ پاشه‌رۆژا وێ
بۆ گه‌هشتن ب خه‌ونان
لێ نه‌دزانی
بازارا وێ یه
كا دێ بیته په‌ریا كێ؟
ل وێ شه‌ڤێ
ئه‌و زارۆكا د خه‌ونێن خوه دا
ساده،
خه‌ون ب بووكه‌كا بێ گیان ددیتن
نه‌دزانی دێ بیته بووكه‌كا ب دوگیان
بۆ هۆڤێن بێ وژدان
هه‌ر وه‌كو ل ئه‌نفالان
ل بیابانان..
د ناڤ خیزێ د زكماك دا مری و
ده‌نگێ وان بلند نه‌فری
نه‌دزانی…
فه‌رمانه…
ئێخسیركرنه و
كه‌نیزه‌كرنا فریشتانه..
دیسان كه‌نیزه‌كرنا كچێن كوردانه
كانیا خه‌ما
مینا ئه‌ورێن بارانی
هه‌كو ژ بهارێ دزێن كانی
وه‌سا خه‌مێن دلێ مه
شین دبن و دبه‌هن
دیسا شین دبنه‌ڤه
زڤستان ژی
لێڤان و بارۆڤه‌یه
كه‌سه‌ر و ژان
ئاخینك ژێ دهێنه خوار
بلا هه‌موو شینبوون
شین نه‌بن.
هێشتا ئه‌م ئه‌وین
یێن دوهی نه‌مرین
نه ژی ژیان
هه‌لگرێن ڤی ده‌مینه
خه‌ما ده‌می ژی
هه‌ر زیندینه.
له‌یستۆكان سپێده و شه‌ڤان
دئالینیت و هێرڤه دئینیت
لێ داویێ پێ نائینیت.
ژین ژێبرا بهارا ژینێ
د ئاتافا بارانا ره‌شدا
دهاته خوارێ و
د ئاقارێ وه‌لاتێ من دباری.
گه‌شاتیا
ڤینێ ژ ناڤ دبه‌ت و
به‌ره‌ق زیندانا ناخێ خوه
دمه‌شینیت
یێ ژه‌نگی و گه‌ماره‌یه
كۆفریێ د هه‌بوونا داستانێن مه دا
دكه‌ت و
سه‌ركه‌ڤتان ل سه‌ر مه تۆمار دكه‌ت
به‌س هزر د رۆژئاڤابوونێ دا
دكه‌ت
ژ ئالیێ رۆژهه‌لاتێ بزڤڕه
دێ رۆژا مه هه‌ر هه‌لێت
هه‌ر دێ بلندبیت
ئالایێ ده‌وله‌تبوونا كوردا
سالح حكیم
