فریشتەیێن ژبیركری
خالد عەلی سلێڤانەیی
دبێژن «تەمەن ب تنێ ژمارەیە» و ژمارە بێ دوماهیە، ژبەركو تەمەنێ بێ دوماهیك نینە؛ لەورا تەمەن نە ب تنێ ژمارەیە، لێ دەمەكە هێدی هێدی مرۆڤی ژ هێز و شیانان دكەت هەتا ب ژمارەیێن ویڤە ژناڤ دبەت. دانعەمر ژی قوربانیێن دەمی نە، ب شەنسن كو گەهشتین وی تەمەنی و هەر وەسا بێ شەنسن ژی ژ بەر ئێش وئازارێن وی تەمەنی..
ب هەلكەفتننا رۆژا جیهانی یا دانعەمران، پێشكێش بۆ وان هەمی فریشتەیێن هێشتا تژی رۆناهی لێ رۆژ و سالان چەنگ لێ بڕین..
دانعەمرن ئەم ژن و پیر
سالا یا خوە دگەل مە گۆت
بلا ئەم نەچن ژ بیر
ما دلێ وە بمە نە سۆت؟!
:: :: ::
دێم وئادگار قرمچین
سالا هێز ژ مە مێتن
راستە ب كوڕ و كچین
لێ ئەم پشتگوه هاڤێتن
:: :: ::
تەمەن وەك خەونێ بۆری
هەر وەكو ئەم نە ژییان
مە بۆ وان خوە كر گۆڕی
حەیفە دەست ژ مە بەردان
:: :: ::
ئەڤرۆ بتنێ بێ چاڤدێر
تەحل بوو ژینا شرین
دنیا هەمی ببیت زێر
پویتە پێ ناهێت كرین
:: :: ::
ئەم ژی دەمەكی خورت بوون
مە خوە نەددا ب چ كەس
رێك و مەودا لمە كورت بوون
مە د گۆت هەر ئەم و بەس
::
ئەڤرۆ پیراتی زوی هات
چاڤ و گاڤ لاوزا كرن
مرنە بۆ مە خەلات
هەیلا تو بخێر بێی مرن
:: :: ::
خۆدیكێ، ئەڤە ئەمن؟!
ئەڤە ناڤچاڤێن مەنە؟!
ژنوی ئەمێ بخوە دحەسن
بلۆر خەمگین بژەنە
:: :: ::
ئەڤ ئالەكێن پرچقی
دوهی بوو جان ناز بوون
عەمر تو چەند دلرەقی
زوی رۆژێن تە دەرباز بوون
:: :: ::
ژیان وە نەخابپینت
چارەنڤیسە ئەڤەیە
مرن زویتر تە نە بیت
حالێ وە ژ حالێ مەیە
ودوماهی ژی هەر چوونە
پیراتی پرۆڤەیە.
