فشارێن دلی ل هاڤینان زێده دبن
د.ئالان گێرتله‌ر تایبه‌تمه‌ندێ نه‌خوشیێن دلی ل زانكۆیا ئاباما ل برمنگهام هوشداریێ دده‌ت كو ل هاڤینان بۆ ده‌مێن درێژ ژده‌رڤه‌ی مالێ نه‌مینن و پێدڤیه مرۆڤی ئاگه‌هـ ژ ره‌وشا ساخله‌میا دلێ خوه هه‌بیت.
گێرتله‌ر دبێژیت: گه‌رماتیا هاڤینێ فشارێ ل دلی زێده‌دكه‌ت ب تایبه‌ت ل ده‌مێ وه‌رزش دهێته ئه‌نجامدان، راهێنان و گه‌رماتیا هاڤینێ گه‌رماتیا له‌شی زێده‌دكه‌ن و بلندبوونا شه‌هێ ڤی هه‌لویستی هێشتا ئالوزدكه‌ت، ژبه‌ركو خوه زوو نابیته هلم دناڤ دێمێ مرۆڤی دا.
هێشتا گۆت: له‌ش دخوازیت گه‌له‌ك خوینێ بۆ دێمی پال بده‌ت هه‌تا سار دبیت و ئه‌ڤه دبیته ئه‌گه‌ر كو خوین كێم بگه‌هیته زه‌ڤله‌كان و ئه‌ڤه‌یه یا دبیته ئه‌گه‌رێ زێده‌بوونا لێدانێن دلی.
نیشانێن هوشداریێ ده‌ست پێدكه‌ن ب خاڤبوونا زه‌ڤله‌كان و بێزاری و دلرابوون و بێهێزی و سه‌رئێشان و خوریان و زێده‌بوونا پلا گه‌رمییا له‌شی.
زانا شیره‌تان دكه‌ن كو هه‌كه هه‌ر ئێك ژڤان نیشانان دیاربوو ل ده‌مێ مرۆڤ ژده‌رڤه‌ی مالێ بیت پێدڤیه مرۆڤ خوه دووربكه‌ت ژ ژێده‌رێ گه‌رماتیێ و گه‌له‌ك شله‌مه‌نیان ڤه‌خوت و جلكێن زێده ژبه‌ر خوه بكه‌ت و له‌شێ خوه ب ئاڤێ ته‌ر بكه‌ت و هه‌كه بۆ ده‌مێ 30 ده‌قیقا هه‌ست ب باشیێ نه‌كر باشتره ب زووترین ده‌م قه‌ستا نوشداری بكه‌ت.
