فلاشباكەكێ سوریالی
وەعد عەبدولرەحمان
باژێرێ گوها
زمانێ ئەورێن دژەبارین
لەشێن سیبەر و سیبەرێن مژێ
هنداڤ گێلەشۆكا دناخا مندا
سەرێ من دكن بازارەكێ مللی..
د كۆلانێن ئاخێ دا
یێن ب بێهنا بارانەكا پاشكەفت تامدای
و هندەك رۆناهیا سار
بۆ یێن وەك من د زارۆكینیا خوە دا ئاسێ ماین
یێن وەك من بیرهاتنا ب بیرهاتنا ئاڤدای
ئاگری بەرددن دلی..
دەڤێن بەش
كەلەخێن مەزن
و مەزنێن بێ لەش
بەرامبەر هەیڤەكا نیڤ یاخی
و نیڤ گەش
مكیاج دكەن كەتوارێ قرمچی..
بیردانك خوە سزا ددەت
قۆناغێن تەمەنی ب قاچاخی
دگەهینیت نێزیكی سنوورێ تاخی
دیوار دیوار وێنە دكەت
و ل بەر دەرازینكا لاندكەكێ رادوەستیت
من یێ زارۆك نیشا ددت
بەلێ ب ناڤەكێ دی، نە ناڤێ من
دەنگەك گازی دكتێ
و ئەز – یێ ب گۆمانم كو ئەزم –
ڤەدچنقم.
