فلمەکێ کوردی پشکداری د فیستیڤالا ئەسفەهانێ دا کریە
ئەڤرۆ نیۆز،زنار تۆڤی:
کورتە فلمێ کوردی بێدەنگ کو ژ دەرهێنانا عەلی عەسگەری و فەڕنوش سەمەدی یە پشکداری ل فیستیڤالا زارۆیان و سنێلەیان ل ئەسفەهانێ دا کریە.
کورتە فلمێ کوردی بێدەنگ کو ژ دەرهێنانا هەڤبەش یا سینەماکارێن ئێرانی و خۆجێن وەلاتێ ئیتاڵیا عەلی عەسگەری و فەڕنوش سەمەدی یە،بەرهەمێ وەلاتێن ئیتالیا و ئەلمانیا یە ل پشکا پێشبرکێن سینەمایا نێڤدەولەتی ل 30 مین خۆلا فیستیڤالا نێڤدەولەتی یا فلمێن زارۆیان و سنێلەیان ل ئیرانێ و ل سینەما نقش جهان ل باژێرێ ئیسفەهانێ دێ هێتە نمایشکرن.
ئەڤ کورتە فلمە چیرۆکا کچەکا کورد کو دایکا وێ پەنابەرە ل وەلاتێ ئیتالیا ڤەدگێریت،کو سەرەدانا نۆشداری دکەن،لێ کچا وێ ل جهێ هندێ کو گۆتنێن نۆشداری بکەتە کوردی بێدەنگ دبیت.
کورتە فلمێ بێدەنگ بۆ ئێکەمین جار ل پشکا پێشبرکێن سەرەکی یێن نێڤدەولەتی یا 69 ل خۆلا فیستیڤالا نێڤدەولەتی یا فلمێن کان ل وەلاتێ فرەنسا و هەروەسا ل چەندین فیستیڤالێن جیهانی هاتیە نمایشکرن،هەتاکو نوکە چەندین خەڵاتێن گرنگی ب دەستڤەئیناینە،هەروەسا ل پشکا پێشبرکێن کورتە فلمێن سینەمایا جیهانی ل چارەمین خۆلا فیستیڤالا نێڤدەولەتی یا فلمێن دهۆکێ ل هەرێما کوردستانێ ژی هاتیە نمایشکرن.
ئەڤ فلمێ کوردی ل دوماهی پشکداریا نێڤدەولەتی یا خوە دا ل پشکا پێشبرکێن نێڤدەوڵەتی ب ناڤ و نیشانێ سینەما سەعادەت ل 35 خۆلا فیستیڤالا جیهانی یا فلمێن فەجر ل کۆمەلا سینەما پەردیسی چارسوو ل باژێرێ تەهرانێ هاتیە نمایشکرن.
ستافێ ئامادەکرنا کورتە فلمێ بێدەنگ پێکهاتینە ژ دەرهێنەر: عەلی عەسگەری و فەڕنووش سەمەدی، سیناریۆ: عەلی عەسگەری و فەڕنووش سەمەدی، بەرهەمهێنەر: جیووانی پۆمپلینی و ئۆلیوێر شانتریۆ، ل سالا 2016 هاتیە بەرهەمئینان.
