فلمە فێستیڤالا دهۆك، شانازیا نەتەوەیەكی یە
مەتین وەرمێلی
سینەما ئێك ژ مەزنترین و كاریگەرترین جۆرێن هونەری یە ل سەر ئاستێ دونیایێ، ژبەر هندێ ژی گرنگیەكا زۆرا مەزن پێ دهێتەدان و پارەكێ مەزن ل درۆستكرنا فلمان دهێتە مەزاختن، و لسەر ئاستێ جیهانێ بەردەوام كار لسەر دروستكرنا فلمێن باشتر دهێتەكرن، كو بشێن سەرنجا خەلكەكی ل هەمی دونیایێ ڕابكێشن و بوویە بزنزەكا مەزن، كو هەڕ ئێكی دڤێت پەیاما خۆ تێدا بگەهینیت، ئەڤجا دیاركرنا كولتوور و دابونەریتان بیت، یان پێشكەفتنا تەكنەلوجیایێ بیت، یان دیاركرنا زولم و زۆریا دەستهەلاتەكێ بیت، یان دیاركرنا ئەڤینەكێ بیت، و ..هتد.
ئەم وەكو كورد ل هەر چار پارچێن كوردستانێ، ژ بەر وێ زۆلم و زۆری و سەركوتكرنا دوژمنێن مە لسەر مە دكر، دەرفەت نەدا جڤاكیا مە زۆی تێكهەلی هونەری ببیت و ب تایبەت سینەمایێ، ژبەر هندێ ژی بەردەستترین هونەر ل دەف مە ستران گۆتن بوو، و بەردەوام مە ب ڕێكا سترانێ پەیامێن خۆ و ئێش و ژانێن خۆ دەربرینە و گەهاندینە، ژبەر ڤێ ژی هەتا بەری چەند سالان ژی جڤاكێ مە ب گشتی ب شێوەیەكێ زۆرێ نەشاز و كێم بەرێ خۆ ددا سینەمایێ و ئەگەر ئێكی ڤیابا كەسەكی ئیهانە بكەت، دا بێژیتێ»تو سینەمایی» یان دێ تە كەمە سینەما، واتە خواندنەكا خەلەت بۆ هاتبووكرن.
بەلێ دگەل ئازاد بوونا باشورێ كوردستانێ ل سەرهلدانا سالا»١٩٩١» و پاشی ب هەرێمبوونا وێ ل سالا «٢٠٠٥»، و برەودانا حوكمەتێن هەرێما كوردستانێ یێن ئێك لدویڤ ئێكێ و گرنگیدان ب هەمی سێكتەرێن ژیانێ، هونەری ژی پێشكەفتن و پێشڤەچوونێن باش ب خۆڤە دیتن، و زۆر كار و چالاكیێن باش و ژ هەژی هاتن كرن و باشورێ كوردستانێ بو ناڤەندەكا بهێز یا هونەری، كو تێدا كەلتور و زمانێ كوردی پێشانی هەمی جیهانێ هاتەدان.
ئێك ژ وان كارێن مەزن ئێن سالانە ژ لایێ حوكمەتا هەرێما كوردستانێ ڤە دهێتە ئەنجامدان، «فلمە ڤیستەڤالا دهۆك یا نیڤدەولەتیە»، ئەڤ سالە گەرا»١٢» سەركەفتیانە هاتە ئەنجامدان، ئەڤە ژی جهێ دلخۆشیێ یە، و شانازیەكا مەزن یا نەتەویە لسەر ئاستێ هەر چار پارچێن كوردستانێ، و ب تایبەت شانازیەكا مەزنە بۆ خەلكێ باژێرێ دهۆكێ ژبەر كو فلمە ڤیستەڤال بوویە كەلتور و مۆركەكێ تایبەت ب دهۆكێ ڤە، و ژ هەمی جیهانێ دهێن و تەماشەیی فلمێن كوردی دكەن= و فلمێن خۆ نیشا گەلێ مە ددەن.
زێدەباری هەمی كەم و كۆڕی و باشی خرابیێن خۆ، بەلێ فلمە ڤیستەڤالا دهۆكێ شیایە پەیوەندیەكا زۆرا ب هێز د ناڤبەرا هەر چار پارچێن كوردستانێ دا دروست بكەت، ئەڤە ژی ب ئێكگرتنێ و تەبایێ و ئێكرێزیێ دێ ب دوماهیك ئێت و ئەم هەمی تێدا د مفادارین و زێدەتر ب دابونەریتێن خۆ ل هەر چار پارچەیان ئاشنا دبین، زێدەباری ناسینا زێدەتر یا كولتوور دابونەریتێن وەلاتێن بیانی و ناساندنا هەبوونا خۆ وەك كورد.
ب هیڤیا هندێ حوكمەت و هونەرمەندێن كورد كارێن باشتر و مەزنتر و كاریگەرتر بكەن د بیاڤێن هونەری ب گشتی و ب تایبەت د سینەمایێ دا، ژبەر كو ئەم ژ چ گەل و نەتەوە و دەولەتێن جیهانێ د كێمتر نینین، بەلكو زمانێ مە كولتوورێ مە خەباتا مە ژ یا هەمی نەتەوەیان زەنگینتر و جوانتر و مەزنترە.
