فه‌رماندا پاراستنا ژینگه‌ها دهۆكێ خه‌لاته‌كێ نێڤده‌وله‌تی دبه‌ت
پشتی راپرسیه‌ك ژ ئالیێ لیژنا بلندا خه‌لاتكرنێ ڤه هاتیه‌كرن، فه‌رماندا پاراستنا ژینگه‌ها دهۆكێ ل دۆر كارگێریا ژینگه‌هێ ده‌رباره‌ی باشترین بكارئینانا رێڤه‌به‌ریا ژینگه‌هی د ئامیرێن حوكمه‌تێ دا خه‌لاتێ سیێ یێ پاشایه‌تیا عه‌ره‌بستانا سعودیێ یێ نێڤده‌وله‌تی وه‌رگرت. ئارمانج ژ پێشكێشكرنا ڤی خه‌لاتی كو هه‌ر دو سالان جاره‌كێ دهێته دان، خورتكرن و چالاككرنا تێگه‌هێ كارگێریا ژینگه‌هێ و بكارئینانا بنه‌ما و شێوازێن كارگێریا ساخله‌مه، هه‌روه‌سا داكو پتر ده‌وله‌ت گرنگیێ بده‌نه ڤی واری و لێكۆلینێن زانستی د وارێ كارگێریا ژینگه‌هێ دا پێشكێش بكه‌ن و ژیاره‌كا ئاست بلند بۆ ملله‌تان بده‌ستڤه بینن.
پشتی فه‌رماندا پاراستنا ژینگه‌ها دهۆكێ ب لێكۆلینه‌كێ ل دۆر بكارئینانا كارگێریا ژینگه‌هێ ئاراسته‌ی رێكخراوا عه‌ره‌بیا گه‌شه‌پێدانا كارگێریێ ل مسرێ كری، هاته قه‌بوولكرن كو ل گه‌ل چه‌ندین لێكۆلینێن دی پشكداریێ بكه‌ت و بچیته د راپرسیێ دا، ئه‌ڤ لێكۆلینه ژ ئالیێ تیمه‌كا كاری ڤه هاتبوو به‌رهه‌ڤكرن كو ژ عه‌مید عه‌بدولكه‌ریم قاسم محه‌مه‌د فه‌رماندێ هێزا پاراستنا ژینگه‌ها دهۆكێ (سه‌رۆكێ تیمێ)، مامۆستایێ هاریكار دكتۆر چاچان جمعه محه‌مه‌د، مامۆستایێ هاریكار دكتۆر ئه‌حمه‌د قاسم محه‌مه‌د ژ زانكۆیا دهۆكێ و ل گه‌ل هنده‌ك كادرێن فه‌رماندێ وه‌كو ئه‌ندام پێكهاتی بوو.
هه‌لبژارتنا سه‌ركه‌فتیان ل گۆر شرۆڤه‌كرنا باده‌كێن به‌ربژاران بوو، كو بۆ ده‌سته‌یا دادڤان و دادوه‌ران هاتنه نمایشكرن و بریار ژ ئالیێ لیژنا بلندا خه‌لاتان ڤه ل سه‌ر هاته دان كو سه‌ر ب رێكخراوه‌كا كۆمكارا ولاتێن عه‌ره‌بیه.
هه‌ژی یه بێژین كو خه‌لاتێ پاشایه‌تیا عه‌ره‌بستانا سعودیێ ب بهاترین و قه‌درترین خه‌لاته د وارێ كارگێریا ژینگه‌هێ دا ل سه‌ر ئاستێ نیشتمانێ عه‌ره‌بی، كو ئه‌ڤ ساله ڤی خه‌لاتی چار ئالی ب خوه‌ڤه گرتبوون، ئێك: باشترین لێكۆلین د وارێ كارگێریا ژینگه‌هێ دا، دو: باشترین بكارئینانا كارگێریا ژینگه‌هی د ئامیرێن حوكمه‌تێ دال وه‌لاتێن عه‌ره‌بی، سێ: باشترین بكارئینانا كارگێریا ژینگه‌هی د كه‌رتێ تایبه‌ت دا، و چار: باشترین كارئینانا د وارێ كارگێریا ژینگه‌ها كۆمه‌لێن ئه‌هلی و یێن مفادار دا.
ل دۆر ڤێ ئێكێ سه‌رۆكێ لیژنا ده‌سته‌یا دادوه‌ریێ دكتۆر (عه‌بدولباست بن سالم سیرفی) خویا كر كو هه‌شت كه‌سێن شاره‌زا د لیژنا وان دانه ل گه‌ل سكرتاریا خه‌لاتێ (رێكخراوا عه‌ره‌بیا گه‌شه‌پێدانا كارگێریێ) كو 96 لێكۆلین ژ 14 وه‌لاتێن عه‌ره‌بی د وه‌رگرتنا ڤی خه‌لاتی دا پشكدار ببوون.
وه‌رگرتنا ڤی خه‌لاتی ژ ئالیێ فه‌رماندا پاراستنا ژینگه‌ها دهۆكێ ڤه ژ وێ خه‌مخۆریێ دهێت كو به‌رده‌وام فه‌رماندا پارستنا ژینگه‌هێ د هه‌می واران دا ئه‌نجام دده‌ت كو سال بۆ سالێ كاروانێ سه‌ركه‌فتنان یێ به‌رده‌وامه، له‌ورا وه‌رگرتنا ڤی خه‌لاتی دگه‌ل ماندیبوون و كاروانێ سه‌ركه‌فتنێن فه‌رماندا دهۆكێ یا هێزا پاراستنا ژینگه‌هێ گونجایه.
هه‌روه‌سا ئه‌ڤ سه‌ركه‌فتنه گرنگیا كارێ هه‌ڤپشكێ تیمێ د ناڤ سازیێن جودا جودا دا دسه‌لمینیت و رۆلێ زانكۆیێ د خزمه‌تكرنا جڤاكی دا و پشكداریا وێ د به‌رچاڤكرنا ئالیێن ئه‌رێنی یێن رۆهن دا تێكه‌ست دكه‌ت هه‌روه‌سا نیشانا جڤاكێ مه‌یه كو د هه‌می مه‌یدانان دا یێ سه‌ركه‌فتی یه.
ل دووماهیێ پێدڤیه ئاماژێ ب ڤێ سه‌ركه‌فتنێ بكه‌م كو تامه‌كا تایبه‌ت هه‌یه، چونكی هه‌ڤركیه‌كا نێڤده‌وله‌تی بوویه و د ده‌مه‌كی دا هات كو هه‌رێما كوردستانێ شه‌رێ تیرۆرێ دكه‌ت، ب ئاوایه‌كی كارمه‌ند و كادرێن فه‌رماندا هێزا پاراستنا ژینگه‌هێ ل ده‌مێ ئه‌و به‌ره‌ڤانیێ ژ ئاخا پیرۆزا هه‌رێما كوردستانێ دكه‌ن و هه‌می رۆژان سه‌ركه‌فتنان تۆمار دكه‌ن باشترین و جوانترین دیمه‌نان ب خوینا خوه وێنه دكه‌ن و تێكه‌ست دكه‌ن كو پێشمه‌رگه یێن شه‌ری و ئاڤه‌دانكرنێ نه.
و: ئه‌ڤرۆ
