فهیسبووك باب و برایه
ب چهند چڕكان ب رێیا فهیسبۆكی پێشمهرگهك شیا بریارهكا دادگههێ گیرۆ بكهت و پتریا خهلكی بۆ خوه رابكێشیت، دیسا شیا د چهند دهمژمێران دا پتریا خهلكی وهك باب و برا ل خوه كۆم بكهت و ناخێ ههر كهسهكێ بههژینت یێ ئهو پارچه ڤیدیۆ دیتی، لێ دیتنا من بۆ ڤێ پارچه ڤیدیۆیێ و خالێن ل سهر من ڤێت باخڤم، پهیاما ڤی پێشمهرگهی ل تۆرێن جڤاكی یێن فهیسبۆكی وهك خواندنهكا سهرپێ بۆ دكهم، دبیژم شیا وهك پهرلهمانتارهك یان نوونهرێ ڤێ تهخا مهزن وهلاتی كو ئهم ههموو ههر دهم ل بهر سپێلت و سۆپان ل مال بێژین ئهم ههمی پێشمهرگهینه، شیا پهیاما خوه وهك پێشمهرگه بگههینیت، بێژم ههر چاوا بیت ئهو ژی وهلاتیهكێ كوردستانێ یه و مافێ ژیارێ ههیه و یێ جانێ خوه دكهته قوربانی ئاخێ و مافێ وی یه چهند مهترێن ئهردی ههبن و ل سهر بژیت، بۆچی دێ كهسهك ژ باشۆر هێته كوردستانێ و جه دێ بۆ هێته دابینكرن و رێكخراو دێ ههموو پێدڤیێن ژیانێ دهنێ، مووچێ وی ژی ههیڤانه دروست دێ بۆ هێت دێ ل دهۆك تهنا و ئارام ژیت ههتا دێ ههڤژینان ژى بۆ ئینن، ههكه بزانیت دێ خانیێ وی هێته خرابكرن و بهروڤاژی وهك مه دیتی وی گۆتی نابینم چ مۆرال ههبیت ل بهر سینگێ دوژمنی براوستیت، دو. دبینم ههكه پێشمهرگه د ناڤا جڤاكێ مه دا و تایبهت دهڤهرا مه ب دهنگ و رهنگ ههموو ئێش و ئازارێن خوه د تۆرێن جڤاكی دا ڤه بگێریت و ببیته دووماهی دهرگهه و رێ بگههینته بهرپرس و پایه بلندێن ڤی وهلاتی، باشه چهند پێشمهرگێن دی نوكه ب ڤی رهنگی ههنه؟ و دبیت خراپتر لێ ژ بهر كاودانێن جڤاكی و شهرم دكهن و نهشێن وهك ڤی بكهن، باشه ل سهر حوكمهتێ و سازیێن دهستههلاتدار چیه بكهن بۆ پێشمهرگێ كوردستانێ و ههر چ نهبوو خانی بهلكو بۆ دابینكرنا گازێ وهرگرتنا قهرزێن ل سهر پێشمهرگهی و كرێداری و گهلهك پێشمهرگان نوكه دبیت پاره نهبیت بچیته سهر ئهركێ خوه، نه ل گهل كارێن نهقانوونی نه و زێدهگاڤیان، لێ ئهڤان كاودانان دا و پێشمهرگه ل بهرامبهر مهزنترین دوژمن و دهركهی و ناڤخوهیی راوستایی و بوویه سومبل بۆ مللهتی و بگههیته وی ئاستی وهزیرێ بهرهڤانیا ئهمریكا بهێته كوردستانێ و پێشمهرگهی خهلات بكهت و رێزێ لێ بگریت و ئهم رێزێ لێ نهگرین دبینم ئهڤه ژی دبیت بكهڤیته خانا خیانهتێ دا ل بهرامبهر ئهڤی پێشمهرگهی، دڤێت پێشمهرگه گهلهك پیرۆزتربیت ژ وێ چهندێ مهزنتر بیت كو بگههیته وی ئاستی چ رێ نهمین و تۆرێن جڤاكی ببنه دووماهی رێ و پهیاما خوه بگههینت، بهرۆڤاژی دڤێت هێلا سۆر بیت و ب رێكێن جودا سهردهری ل گهل بهێتهكرن، چونكه پێشمهرگه زامنێ تهناهی و ئارامی یا كوردستانێ یه و شیایه ل سهر روویێ ئهردی ههیبهتا داعشێ بشكێنیت و ئهم ههموو شازانیێ پێ دبهین.