فوتسالا زاخۆ چاڤه‌ڕێ خولا كوردستانێ یه
ئه‌ڤرۆ، زاخۆ،عه‌لی حاجی:
د داخویانیه‌كێ دا راهێنه‌رێ تیما فوتسالا یانه‌یا زاخۆ بۆ رۆژناما ئه‌ڤرۆ دیار كر هه‌تا نوكه پاشه‌رۆژا وه‌رزێ نوو یێ خولا نایابا كورستانێ دیار نینه و ئه‌و پێدڤی ب ئینانا هنده‌ك یاریزانێن نوویه بۆ ناڤ رێزێن تیمێ.
زێده‌تر دلوڤان محه‌مه‌د گۆت: بۆ ده‌مه‌كه ئه‌و مژوولی دروستكرنا تیمه‌كا كچان یا فوتسالێ ل باژێرێ زاخۆ بوون و برێیا رێكخراوه‌كێ وان شیا تیمه‌كێ به‌رهه‌ڤبكه‌ن و نوكه دا ئه‌و تیم سه‌ر ب یانه‌یا زاخۆ ڤه، ئه‌م به‌رده‌وام به‌رهه‌ڤیان دكه‌ین بۆ باشتركرنا ئاستێ یاریزان ب مه‌ره‌ما وێ چه‌ندێ پشكداریێ د خولا فوتسالا كوردستانێ دا بكه‌ین ل سه‌ر ئاستێ كچان دا و بۆ چه‌ند جارا یه ئێكه‌تیا ته‌پا پێی یا كوردستانێ چه‌ند ژڤانه‌ك داینه ژبۆ ده‌ستپێكرنا وه‌رزێ نوو یێ خولێ لێ هه‌تا نوكه چ دیار نینه هه‌ر چه‌نده وه‌كو تیما زاخۆ ب رێیا نڤێساره‌كا فه‌رمی مه پشكداریا خوه د خولێ دا ئێكلا كریه، وه‌كو كادرێ راهێنانان و یاریزانێن تیما مه بێ به‌رامبه‌ر كار دكه‌ین لێ مه پێدڤی ب پشته‌ڤانیه‌كا ماددی یا كێم هه‌یه هه‌تا كو ره‌وشا وێ باشتر ببیت.
ناڤهاتی ئه‌و چه‌نده ژی گۆت: یاریزانێن دگه‌ل مه دا پرانیا وان پشكداری د خولێن فه‌رمی دا نه‌كرینه و ژ بۆ وه‌رزێ نوو یێ ژی وان ب كێماسی پێدڤی ب ئینانا سێ یاریزانێن دیتر یێن خودان سه‌ربور هه‌یه، تیما مه پێدڤی ب پشته‌ڤانیێ هه‌یه دا كو د سالێن بهێت ژی دا یا به‌رده‌وام بیت و هه‌كه ره‌وش ب ڤی ره‌نگی بیت د سالێن بهێت دا ب زه‌حمه‌ت به‌رده‌وامی ب ڤێ تیمێ بهێته دان و هه‌تا راده‌یه‌كێ ژی ده‌سته‌یا كارگێریا یانا زاخۆ پشته‌ڤانیێ ل مه دكه‌ت لێ مه پێدڤی ب پشته‌ڤانیه‌كا باشتر هه‌یه .
