فڕۆكێن توركیا 21 موشه‌ك ل گوندێ مژێ دان
ئه‌ڤرۆ، مه‌حمود نهێلی:
د بوردۆمانا دو رۆژێن ده‌رباز بووی دا ل سه‌ر گوندێ مژێ یێ گرێدایی ناحیا دێره‌لۆكێ ل قه‌زا ئامێدیێ پرۆژه‌كێ خودانكرنا ته‌رش و كه‌والی ب ئێك جاری هاته ژناڤبرن و ئاگره‌كێ مه‌زن به‌ربوویه دارستانا ده‌ڤه‌رێ و زیانێن زۆر گه‌هشتینه ره‌ز و باغێن وه‌لاتیان.
محه‌مه‌د محسن خودانێ ئێك ژ پرۆژێن خودانكرنا ته‌رش و كه‌والی ل دڤه‌رێ بۆ رۆژناما ئه‌ڤرۆ دیار كر، ئه‌و پرۆژێ هاتیه بوردۆمانكرن ب تنێ 150 میتران دووری پرۆژێ وان بوویه و ئه‌و ئێكه‌م كه‌س بووینه گه‌هشتینه جهێ روودانێ و گۆت: “پرۆژه ب نه‌پالێ هاتیه بوردۆمانكرن و ب ئێك جاری هاتیه ژناڤبرن و دۆرێن 100 سه‌رێن په‌زێ سپی و كاڤران ژناڤچووینه، لێ سوپاس بۆ خودێ چ زیانێن گیانی نه‌بووینه، ئه‌و خێزانا ب كارێ شڤانیێ ل وێرێ بوون هاتنه رزگاركرن”.
ژلایێ خوه ڤه تاهر مژی، هه‌لبژێرێ گوندێ مژێ بۆ رۆژناما ئه‌ڤرۆ دیار كر، ل رۆژا ئێكێ یا بوردۆمانێ 16 جاران ئاقارێ گوندێ وان هاته بوردۆمانكرن و ل رۆژا دویێ ژی ب پێنج موشه‌كێن نه‌پال نێزیكی گوندێ وان هاته بوردۆمانكرن و گۆت: “گره‌كێ بچووك یێ د ناڤبه‌را وی جهێ هاتیه بوردۆمانكرن و سه‌نته‌رێ گوندێ وان دا هه‌ی و ژ كیلۆمه‌تره‌كێ كێمتره و ساجمه و به‌ر ل ناڤ گوندی كه‌ڤتینه”.
تاهری گۆتژی: “ئاگره‌كێ مه‌زن به‌ربوویه ئاقارێ وان و خه‌لكه‌كێ زۆر و پولیسێن ئاگڕڤه‌مراندن و پۆلیسێن دارستانێ و پێشمه‌رگه‌یێن ژینگه‌هێ هاتینه، لێ نه‌شیاینه كونترۆل بكه‌ن”.
هه‌لبژێرێ گوندێ مژێ ئاشكرا ژی كر، نوكه دۆرێن 18 مالان ل گوندێ مژێ ئاكنجی نه، له‌و داخواز كر، كو ئه‌ڤ هێرشه بهێنه راوستاندن، داكو ئه‌و ژی بشێن ل سه‌ر گوندێ خوه ب ئازادی ژیانا خوه ببنه سه‌ر و ب ڤی ره‌نگی ژیانا وان یا د مه‌ترسیێ دا و د ناڤ گوندی دا دورپێچ كرینه.
