فڕۆكەیێن توركیا دو وەلاتیێن ناوچەداریا شێلادزێ شەهیدكرن
ئەڤرۆ
ئامێدیێ، مەحمود نهێلی:
پشتی بۆ دەمێ پتر ژ ١٠ رۆژان دو وەلاتیێن ناوچەداریا شێلادزێ بێ سەروشوون بووین، ل رۆژا 14/4/2023 تەرمێ وان هاتە دیتن، كو ژ لایێ فڕۆكەیێن توركیا ڤە هاتبوونە شەهیدكرن.
رزگار عوبەید، رێڤەبەرێ ناوچەداریا شێلادزێ بۆ رۆژناما ئەڤرۆ دیار كر، ئەڤ هەر دو وەلاتیە ب مەرەما ئینانا گل و گیایێ بهارێ قەستا چیایێ شرینێ كر بوون ل دەڤەرا بارزان و گۆت: «ب مخابنی ڤە بووینە ئارمانجا فڕۆكەێن لەشكرێ توركیا و هاتینە شەهیدكرن».
خویا ژی كر، ئەو هەر دو وەلاتیە بناڤێن (ئەحمەد حەسەن ٣٥ سال و عارف عومەر شاجی ٥٠ سال)ن كو قەستا گۆت: «تەرمێن وان ل گۆرستانا كۆمەلگەها سیریێ هاتنە ڤەشارتن، دیسا ئەم داخوازێ ژ خەلكێ دەڤەرێ دكەین قەستا ڤان جهێن موحەرەم نەكەن، داكو گیانێ وان یێ پاراستی بیت».
دهێتە زانین د ڤان سالێن داویێ دا پتر ژ ٤٠ وەلاتیێن ناوچەداریێن دێرەلۆك و شێلادزێ ژ لایێ فڕۆكێن توركیا ڤە هاتینە شەهیدكرن و هەژمارەكا دی ژی بریندار و پەكەفتی بووینە.
دیسا ژێدەرەكێ ئەولەهیێ بۆ ئەڤرۆ دیار كر، دوهی سپێدێ ل سەر رەخێ رووبارێ زێ تەرمێ كەسەكی دهێتە دیتن و گۆت: «ئەڤ تەرمە د ئاڤێ دا هاتیە و ناسناما وی نەهاتیە زانین و هاتە ڤەگوهاستن بۆ نۆشدایا داد ل دهۆكێ«.
