فڕۆكەیێن توركیا سێ وەلاتیێن ناوچەداریا شێلادزێ كرنە قوربانی
ئامێدیێ، مەحمود نهێلی:
ژ ئەنجامێ بۆردمانا فڕۆكەیێن لەشكرێ توركیا بۆ سەر دوروبەرێن گوندێن دەڤەرا ئامێدیێ، ل رۆژا ئەینی 8/3/2024 دو وەلاتیێن گوندێ دێویكێ یێ سەر ب ناوچەداریا شێلادزێ ڤە شەهید بوون و ئێكێ دی ژی بریندار بوو.
رێبەر محەمەد ئێك ژ كەسوكارێن قوربانیان بۆ رۆژناما ئەڤرۆ دیار كر، ئەو كەسێن بووینە قوربانی خەلكێ گوندێ دێویكی یێن دەڤەرا زێبارێ نە و گۆت: «ب مەرەما ئیناكا گل و گیایێ بهارێ ئەو وەلاتیە ژ مال دەركەفتبوون، ب تنێ دو كیلۆمەتران دووری گوندێ خوە ببون، پشتی نیڤ دەمژێرێ ئەو كەسێ بریندار تێلەفۆنا مال كریە و گۆتیە د هەوارا مە وەرن ئەم یێن هاتینە بۆردمانكرن، پشتی كەسوكارێن وان گەهشتینە جهێ روودانێ دیار بوویە، كو دو ژ وانا بناڤێ سەعید موبارەك یێ ٣٥ سالی و ئاراس فەرەج یێ ٢٩ سالی شەهید بووینە و سالح موبارەك یێ ٤٠ سالی ژی بریندار بوویە».
دهێتە زانین د ڤان دو هەیڤێن دەربازبوویێن ئەڤ سالە دا فڕۆكەیێن توركیا 241 جاران دەڤەرێن سنووری یێن هەرێما كوردستانێ بۆردمانكرینە و ل سالا ٢٠١٥ هەتا نوكە ٦١ وەلاتی شەهید بووینە و پتر ژ ٢٥ وەلاتیێن دی ژی بریندار بووینە كو پرانیا وان خەلكێ دەڤەرا ئامێدیێ و دێرەلۆكێ شێلادزێ بووینە.
