فۆتسالا زاخۆ چاڤ ل ناسناڤێ كوردستانێ یە
زاخۆ، عەلی حاجی:
د داخویانیەكێ دا راهێنەرێ تیما فۆتسالا كچێن زاخۆ بۆ رۆژناما ئەڤرۆ دیار كر تیما وان حنێرا خولا نایابا كوردستانێ یا فوتسالێ بوو و چاڤێ وان ل ناسناڤی یە و هەموو تیم ژی هزرەكا مەزن ژ وان دكەن.
زێدەتر دلوڤان محەمەد گۆت: هەرچەندە ل دەستپێكا وەرزێ ئەڤ سالە یێ خولا نایابا فۆتسالا كوردستانێ ل سەر ئاستێ كچان ئەنجامێن تیما مە د باش نەبوون لێ دگەل بورینا دەمی ئەنجام باشتر بوون، من باوەریەكا مەزن ب تیما خوە هەبوو ژبەر كو د هەموو یاریان دا ئاست پێشكێشكرن لێ پشتی زێدەتر هەماهەنگی و لێك تێگەهشتنەكا باش بۆ یاریزانێن مە دروست بووی ئەنجامێن مە باشتر لێهاتن و ئەم بووینە حنێرا خولا ئەڤ سالە و ئەڤچەندە ژی بۆ مە دەستكەڤت بوو كو ئێكەم جارە پشكدار بووین و شیاین دەربازبینە چارگوشا زێرین كو د ڤێ قۆناغێ دا چاڤێ مە ل ناسناڤی بیت، هەكە بگەهینە یاریا دوماهیێ ژی بۆ مە دەسكەڤتیە و دێ هەموو بزاڤان كەین بشێن ناسناڤی ب دەستخوەڤە بینن و ئەم یێ نێزیكی وێ ئامانجێ ژی بووین.
ناڤبری ئەوچەندە ژی گۆت: مە پێدڤی ب پشتەڤانیا ماددی و مەعنەوی هەیە زێدەتر ژی یا مەعنەوی ب تایبەتی پشتەڤانیا كارگێری و جەماوەری ژبەر كو ئەو دێ هێزەكا باشتر دەنە مە كو بشێن شەری بۆ ناڤێ زاخۆ بكەین و باوەریەكا مەزن ب ڤێ تیمێ هەیە كو دێ شێت ئەنجامێن باش ب دەستخوەڤە بینیت د چارگوشا زێرین دا .
