فۆتسالا گاره خوه ژ خولا كوردستانێ ڤه‌كێشا
ئه‌ڤرۆ، زنار زوبێر:
سه‌روكێ یانا گاره یا وه‌رزشی دیاركر پشتی بزاڤێن وان ژبۆ چاره‌سه‌ركرنا كێشا جهێ راهێنانێ و یاریان سه‌ر نه‌گرتین ئه‌و نه چاربوون بڕیارا خوه‌ڤه‌كێشانێ ژ وه‌رزێ نوو یێ خولا پلا نایابا كوردستانێ یا فۆتسالێ ل سه‌ر ئاستێ كچان رابگه‌هینن، ئه‌وا بریاره هه‌ڤڕكیێن وێ ل ئێكشه‌مبیا بهێت ده‌ستپێبكه‌ن.
زێده‌تر شێروان بشار د داخویانیه‌كا تایبه‌ت دا بۆ رۆژناما ئه‌ڤرۆ گۆت: ده‌مه‌كه تیما مه یا فۆتسالا كچان به‌رهه‌ڤی بۆ هه‌ڤركیێن خولا هه‌رێما كوردستانێ دكرن و راهێنانێن خوه ل یاریگه‌ها ڤه‌كری یا ناڤه‌ندا وه‌رزش لاوێن دهۆكێ ئه‌نجامدان، سه‌رباری بزاڤێن مه و ب نڤێسارێن فه‌رمی ئاراسته‌یی رێڤه‌به‌ریا وه‌رزشی و نوونه‌راتیا لژنا ئۆلۆمپی و جهێن په‌یوه‌ندیدار كری ژبۆ چاره‌سه‌ركرنا كێشا مه كو هۆلا تایبه‌ت یا راهێنانێ و یاریان به‌رهه‌ڤبكه‌ن ژبه‌ركو خولا كوردستانێ یا فۆتسالا كچان ل هۆلان دهێنه كرن و د نوكه دا هۆلا گرتیا چالاكیێن وه‌رزشی یا په‌روه‌ردا رۆژئاڤا هاتیه ته‌رخانكرن بۆ ڤاكسین دانانا په‌تایا كۆرۆنایێ، مه داخازا چاره‌سه‌ریه‌كێ كربوو ژوانا گوهۆرینا چهێ ڤاكسینێ ژ هۆلا وه‌رزشی بۆ جهه‌كێ دی و ئه‌ڤچه‌نده ژی ب جه نه‌هات، له‌ورا ئه‌م نه‌چاربووین پشتی چو پێنگاڤێن چاره‌سه‌ریی دیار نه‌بووین كارگێریا یانێ هه‌موو رازیبوون ل سه‌ر خوه‌ڤه‌كێشانا تیما فۆتسالێ د خولا كوردستانێ دا و مه نڤێساره‌كا فه‌رمی ل گه‌ل ئه‌گه‌رێن خوه ڤه‌كێشانێ بۆ ئێكه‌تیا ته‌پا پێی یا هه‌رێمێ هنارتیه پێنه‌ڤێت هه‌موو لایه‌نێن په‌یوه‌ندیدار به‌رپرسن ژ ڤێ ره‌وشێ.
