فۆتۆ پشكەكە ژ روحا من
زنار تۆڤی:
وێنەگر (هەلۆ جەباری) د دیدارەكێ دا بۆ رۆژنامەیا ئەڤرۆ گۆت: دژیەكێ بچووكدا من حەز ل سەر هونەرێ شێوەكاری هەبوو، د ژیێ شەش سالییێ دا من پشكداری د چالاكیێن قوتابخانەیان دا كرینە، ل سالا 2000 ئەز چوومە د ناڤ كارێ فۆتۆگرافی دا و هەتا نوكە من چار پێشانگەهێن تایبەت ڤەكرینە و پشكداری د دەهان پێشانگەهێن هەڤپشكدا كریە ل سەر ئاستێ كوردستانێ و عیراق و ئیرانێ ڤەكرینە و د چەندین بەریكانەیێن فۆتۆگرافیدا من پلەیا ئێكێ و ئەنجامێن باش هەبووینە، هەتا نوكە من 25 خۆل و كورسێن فۆتۆگرافی ل سەر ئاستێ كوردستانێ ڤەكرینە.
هەروەسا گۆت: ئەڤە نێزیكی 20 سالانە، ب فۆتۆیان من باژێرێ سەید سادق ئەرشیف كرینە، ژ وان ژی وەرزش و كۆر و كۆمبوون و فیستەڤال و چالاكیێن دی یێن جودا، بەلێ د روویێ فۆتۆگرافی دا من پتر د وارێ فۆتۆیێن سروشتی و پاشی پۆرترەیت كاركریە،و نوكە فۆتۆ بۆ من پشكەكە ژ روحا من، هەروەسا جهێ خۆشحالیێ یە ل ڤان سالێن دووماهیێ بۆ گەلەك كەسان، هەكە ب رێژەكا كێم ژی بیت، فۆتۆ بوویە ژێدەرێ دارایی و هەكە خودانێ فۆتۆیی وەكو فۆتۆگرافەر بشێت وەكو كەڤال فۆتۆیان بفرۆشیت و مفایی ژێ ب بینیت، گەلەك یا كێمە، من ب خۆ ل سالا 2019 د پێشانگەهەكا فۆتۆگرافیدا هندەك فۆتۆیێن جودا نیشاندان بۆ فرۆشتنێ و پێشوازیەكا باش لێ هاتە كرن.
