فۆرمێن ئەردی ل سەر فەرمانبەرێن گرێبەست دێ هێنە بەلاڤكرن
هەولێر، قائید میرۆ:
بەرپرسەكێ وەزارەتا باژێڕڤانیان ئاشكراكر، ب مەرەما كۆمكرنا هووركاریان شاندەكێ وەزارەتا باژێڕڤانی و گەشتوگوزارێ سەرەدانا سەرۆكایەتیا جڤاتا وەزیران كریە و دبێژیت: بڕیارە ل نێزیك فۆرمێن وەرگرتنا ئەردی ل سەر فەرمانبەرێن گرێبەست بهێنە بەلاڤكرن.
سەربەست مەولود، رێڤەبەرێ قانوونی ل وەزارەتا باژێڕڤانیان بۆ رۆژناما ئەڤرۆ دیاركر، شاندەكێ وەزارەتا باژێڕڤانی و گەشتوگوزارێ سەرەدانا سەرۆكایەتیا جڤاتا وەزیران كریە ب مەرەما كۆمكرنا داتایێن فەرمانبەرێن گرێبەست ل هەموو فەرمانگەهێن حوكمەتا هەرێما كوردستانێ، داكو پرۆسێسا مفاداربوونا فەرمانبەرێن گرێبەست ب شێوەیەكێ بێ ئاستەنگ بڕێڤەبچیت و ژ بڕیارا سەرۆكێ حوكمەتا هەرێما كوردستانێ بۆ وەرگرتنا پارچەیێن ئەردی مفاداربن».
سەربەست مەولود گۆت ژی: «نێزیكی 30 هزار فەرمانبەرێن گرێبەست ل سەرانسەری هەرێما كوردستانێ هەنە و نێزیك دێ فۆرمێن پڕكرنا زانیاریان ل دۆر بەلاڤكرنا پارچەیێن ئەردی گەهنە هەموو فەرمانبەرێن گرێبەست، گورەی بڕیارا حوكمەتێ ژی هەمان مەرجێن بۆ فەرمانبەرێن ئاسایی هەین، بۆ فەرمانبەرێن گرێبەست ژی هەنە و هەر فەرمانبەرەكێ گرێبەست هەشت سال خزمەت هەبن و بەری نوكە مفادار نەببیت، دێ پارچەكا ئەردی وەرگریت».
