فۆرمەكا نوو بۆ پێشینەیا چاڤدێریا خێزانی دێ هێتە بەرهەڤكرن
هەولێر، قائید میرۆ:
پەیڤدارێ وەزارەتا كار و كاروبارێن جڤاكی ل حوكمەتا هەرێما كوردستانێ دیار كر، بەلاڤكرنا پێشینەیا چاڤدێریا خێزانی گرێدایی رەوشا داراییا هەرێما كوردستانێ یە و بڕیارە فۆرمەكا نوو ل دۆر وان كەسێن مفادار دبن بهێتە بەرهەڤكرن.
ئاریان ئەحمەد، پەیڤدارێ وەزارەتا كار و كاروبارێن جڤاكی بۆ رۆژناما ئەڤرۆ خویا كر، بەری قەیرانا دارایی نێزیكی 100 هزار كەسان ل هەرێما كوردستانێ پێشینەیەكا مەهانە یا چاڤدێریا خێزانی وەردگرت و گۆت: «پشتی شەڕێ داعشێ و قەیرانا دارایی ئەو پێشینە هاتیە راگرتن، خەلكەكێ زۆر ژێ مفادارببوو، بەلێ بێسەروبەریەك پێڤە دیاربوو، ئەو كەسێن مفاداربووین، هەژمارەك ژ وان هەژی وەرگرتنا وێ پێشینەیێ نەبوون و مەرجێن مفاداربوونێ زۆر دگران نەبوون».
ئاریان ئەحمەد گۆتژی: «چەندین جاران وەزارەتا كار و كاروبارێن جڤاكی بزاڤێن ڤەگەڕاندنا پێشینەیا چاڤدێریا خێزانی كریە، بەلێ ژ بەر نەبوونا شیانێن دارایی نەهاتیە دەستپێكرن، بڕیارە فۆرمەكا نوو بهێتە بەرهەڤكرن و مەرجێن نوو ژی بهێنە دانان بۆ كەسێن مفادار دبن، چونكی بەرێ ژنێن بێسەرپەرشت و قوتابیێن زانكۆیێ یێن خێزاندار و كچێن قەیرە و چەندین تەخێن دی مفادار بووینە، لەوڕا پێدڤی ب گوهۆڕین و پێداچوونێ هەیە».
