فیدارسیۆنا تەپا پێی یا پارێزگەهێ: مە داخواز كرییە خولا راهێنانێ یا ئاستێ بی بهێتە ڤەكرن
فیدراسیۆنا تەپا پێی یا پارێزگەها دهۆكێ دیار كر ئەوان داخوازی ژ فیدراسیۆنا تەپا پێی یا ئیراقێ كرییە ژبۆ ڤەكرنا خولا بی یا ئاسیایی بۆ راهێنەرێن هەلگرێن جورێ C و چاڤەڕێ بەرسڤێ نە.
فەرزاد محەمەد عەلی جێگرێ سەرۆكێ فیدراسیۆنا تەپا پێی یا پارێزگەهێ بۆ رۆژنامەیا ئەڤرۆ گۆت: ب سەركەفتیانە خولا راهێنانێ بۆ ئاستێ C ب پشكدارییا 24 راهێنەرێن ل سنۆرێ پارێزگەها دهۆكێ ب دووماهی هات، ئەوا بۆ ماوەیێ 15 رۆژان ل هۆلا گرتییا بنگەهێ لاوان و یاریگەها پیرس ژلایێ وانەبێژێ ئاسیایی خسرۆ گۆرەن ب شێوەیێ تیۆری و پراكتیكی و ب هەڤكاری دگەل هەر ئێك ژ د. ئازاد ئەحمەد مامۆستایێ زانكۆیی و راهێنەرێ جەستەیی و دیسان سلێمان رەمەزان راهێنەرێ یانەیا دهۆك و هەلگرێ باوەرنامەیا ئەی پرۆ یا ئاسیایی كو وانەیێن بهێزكرنا شیانێن راهێنانێ و پلانێن دناڤ یاریگەهێ دا هاتبوونە شرۆڤەكرن.
ناڤهاتی ئەوچەندە دیار كر فیدراسیۆنا تەپا پێی یا ئیراقێ و وانەبێژێ نێڤدەولەتی پەسنا رێكخستنا خولێ و كری و گۆت: پێخوەشحالین ئەم شیایین كۆمەكا دی یا راهێنەرێن گەنج ب باوەرنامەیا سی شادبكەین و بكەڤنە د خزمەتا وەرزشا كوردستانێ ب گشتی و تیم و یانەیێن پارێزگەها دهۆكێ ب تایبەتی دا، یا گرنگ راهێنەرێن مە ب شێوەیی ئەكادیمی و زانستی ئاستێ خوە پێشبێخن و دێ دگەل فیدراسیۆنا تەپا پێی یا ئیراقێ د ووركشۆپێن ئۆنلاین دا بەردەوامبن، لەوما بۆ ڤێ یەكێ ژی مە داخواز كرییە خولا جورێ B ژی بۆ راهێنەرێن مەبهێتە ڤەكرن تایبەت ئەوێن ئەڤە چەند سالە جورێ سی هەیی و گەشبینم هەكە پشتەڤانی بۆ ئەڤان راهێنەران هەبیت دێ خزمەتەكا باش پێشكێشی وەرزشێ و یاریزانان كەن.
