فیستەڤالا فلمێن کوردی یا دویێ ل ڤانکوڤەر – کەنەدا
ئارام دهۆکی – کەنەدا
ل رێکەفتی ١٧ – ٢٠٢٥/١٠/١٩ کو بۆ دەمێ سێ رۆژان نیشاندانا ژمارەیەک فلمێن کورت و درێژێن کوردی هاتن پەخشکرن ل باژێرێ ڤانکوڤەر-کەنەدا بئامەدەبوونا ژمارەک بەرچاڤ ژ هەموو پارچێن کوردستانێ.
هەر ژ پشتی سەرهلدانێ ل ١٩٩١ ێ یان بهیرتر هەر ژ کەتنا رژێما بەعسێ ل عیراقێ و کوردستانێ. جڤاکێ هەرێمێ وەکو هاولاتی و وەکو سیستەما حکومی روویەک باش دایە کار و بارێن هونەری، جڤاکی، چاندی و… .هتد..
هەلبەت بەرچاڤبوویە کو ئێک ژ وان بواران گرنگی دان بئەنجامدانا فیستەڤالێن فلمان بوویە داکو جڤاکێ کوردستانێ برێیا دیتنا فلمان ئاگاداری رەوش و تیتال و پێشڤەچوونا تەماما جیهانێ بکەت. ئێک ژوان باژێرێن کو فیستەڤال گەلەک بخەمڤە گرتین باژێرێ دهۆکێ بوو،. هەلبەت د سەرهندێ را کو وەلاتیێ دهۆکێ ئەزموونەک و رابردوویەک گەلەک بەرفرە نەبوویە د گەل فلمان هەتا هەبوونا سینەما ژ بەرکو هەتا نوکە ژی بتنێ ئێک سینەما هەبوویە ل ڤی باژێری لێ دسەر هندێ را ئەڤە بۆ چەندین سالە ئەڤ فیستەڤالە دهێنەکرن و سال بۆ سالێ باشتر و بەرفرەهتر لێ تێت. ئەنجامدانا ڤان فیستەڤالا لسەر خودان شیان و حەز ژێکەرێن ئەکتەریێ و دەرهێنەران هەوقاس کاریگەربوو و بمفا بوو کو بشێت تاکە کەسێن مینا عارف (ئاری) سالح کو گەنجەکێ خەلکێ دهۆکێ یان رزگار حەمە رەشید پێکبینیت کو کاریگەرا ئەنجامدانا وان فیستەڤالان هەوقاس ل سەر بمینە کو هەتا بگەهن وەلاتێن گەلەک دوورێن مینا کەنەدا ژی هەر بمینن داغبار کو لڤێرە ژی پشتی گەهانا وان بچەند سالەکێن کێم رابن بئەنجامدا فیستەڤالەک وەسان بەرفرە و لێکدای ژ هەموو ئالیێن خوە یێن ریکخستنێت جودا جودا و پەیداکرنا سەپونسەران و پشتەڤانێت جڤاکێ کوردی ل وی باژێری و تەنانەت رازیکرنا هەردوو حکومەتێن فیدرال و هەرێما ب سی ل وەلاتێ کەنەدا. کورد وەکو گەلەک بندەست و تێنیێ ئازادیێ ئەڤ ئەزموونە خوەیا دکە گەر دەلیڤە بۆ کوردا بگوونجە وەسان دیاردبە کو د شێت زوو سوودی ژ ئەزموونێت هونەری و روشنبیری وەرگرە و ل قولیچەکا جیهانێ بکار بێخە و تەڤایا جڤاکی سوود بەخشبە، باشترین نموونە بۆ ڤێ چەندێ فیستەڤالا دووێ یا فلمێن کوردی ل ڤانکوڤەر کو تێت نیاسین باژێرێ هونەری مینا لوس ئەنجلوسا ئەمریکی د باوارێ فلمسازی و دەرهێنانێدا.
ئەنجامدانا فیستەڤالا دویێ یا فلمێن کوردی ل ڤانکوڤەر مفایێن ئێجگار مەزن لسەر ئاستێ تاکە کەس و جڤاکا کوردی ل کەنەدا بگشتی و ل باژێرێ ڤانکوڤەر بتایبەتی هەبووینە، هەلبەت لبن دروشمێ پیتەدان بزمانێ دایکێ بوو کو پیتەدان بزمانێ دایکێ نەمازە لدەرڤە بۆ نڤشێ نوو ل دەرڤەی وەلات دبیت گەلەک خالەک گرنگە ئەڤە ژ بلی ل هەڤگەهاندنا کومەلایێن کوردان مینا ئێک رەگەز و ئێک مللەت، لەوان بحازربوونا بسەدان کوردێن هەموو پارچان د هاتن دیتن کو پرانیا وان بجل و بەرگێن کوردی دهاتن دیتن. ل دووڤ پرۆگرامێ دووم درێژێ کوما رێکخەرێن ڤێ فیستەڤالێ حەزا وان هەیە سال بۆ سالێ ڤێ فیستەڤالێ مەزنتر و کاریگەرتر لێ بکەن و بەلکو ڤەگوهێزن بۆ هەرێمێن دی یێن ولاتێ کەنەدا بتایبەتی جهێ جڤاکێ کوردی لێ دزێدە و ئەڤە ژبلی کو ژمارە بەرچاڤ یێن هاولاتیێن کەنەدی ژی د هاتن دیتن د ناڤا سالا سینەما سێنپلاکس کو د کەڤە ناڤەراستا باژێری ڤانکوڤەر، پشکداریا وان ژی د بیتە ئەگەرا ئاشنابوونا خەلکێ بیامیا بچاند و دوز و رەوشا کوردا لسەر خاکا وان کو ئەڤ خالە گەلک گرنگە کورد پیتەیەک ئێجگار زێدە پێ بدەن.
