فینالا كۆپا ئیراقێ ژ سلێمانیێ بۆ بەغدا هاتە ڤەگوهاستن
پشتی كو ل رۆژێن بۆری لژنەیا بەریكانەیان ل فدراسیۆنا فوتبۆلا ئیراقێ ڕاگەهاندی یاریگەها نەورۆز ل پارێزگەها سلێمانیێ ل ئەینییا بهێت دێ مێڤاندارییا یارییا فینالا كۆپا ئیراقێ دناڤبەرا هەردو یانەیێن دهۆك و زاخۆ هێتە كرن، دوهی هاتە ڕاگەهاند فینال ژ باژێرێ سلێمانیێ بۆ پایتەختێ ئیراقێ هاتە ڤەگۆهاستن.
ل دۆر ئەگەرێن ڤەگۆهاستنێ ڕێڤەبەرییا گشتی یا وەرزشی ل هەرێما كوردستانێ روهنكرنەكا فەرمی بەلاڤكر تێدا هاتییە، ژبەركو دەوروبەرێن یاریگەهێ تەمام نەكریە و ئەڤچەندە ژی ئەركێ هێزێن ئەمنی دێ ب زەحمەتر لێكەت د دەمێ توندوتیژیەكا جەماوەری پەیدابیت، هەروەسان نەبوونا بەربەستێن دەرڤەی یاریگەهێ و جهێ هاتنووچوونا دناڤ یاریگەهێ دا مەترسی ل سەر قەرەبالغێ پەیداكەت.
هەروەسان دیاركرییە، ژبەر نەبوونا زێرەڤانێن پێدڤی بۆ جهێن جودا ژ وانا سیستەمێ ڤارێ دێ كاریگەرییەكا خراب هەبیت، دیسان نەبوونا هێزێن ئەمنی یێن تایبەت دەوروبەری یاریگەهێ، دیسان، نەورۆز جهێ 13 هزار پشتەڤانایە ددەمەكی دا هاتییە پێشبینیكرن هژمارەكا زێدەتر ژ یا دیاركری بهێنە دناڤ یاریگەهێ دا، لەوما ژی یا گۆنجایی نینە یاری ل یاریگەها نەورۆز بهێتە كرن.
یانەیا دهۆك ژی رۆهنكرنەك بەلاڤكر
پشتی كارگێرییا یانەیێ كۆمبوون دگەل د. عەلی تەتەر پارێزگارێ دهۆكێ كری ل سەر چەند خالان ڕاوەستیایین ژ وانا، هەر یاریگەهەكا فدراسیۆنا فوتبۆلا ئیراقێ پێشنیاركری یانەیا دهۆك ڕازیبوویە بێ ئاریشە، بڕیاریا دەستنیشانكرنا یاریگەها نەورۆز ب سنگەگێ بەرفرەهـ هاتییە وەرگرتن لێ دیاربوو دناڤا سۆشیالێ دا زێدە كارڤەدانێن خوە هەبوو و ترسا مە ژی ئەوبوو ژ قالبێ خوە بدەرگەڤیت و بەر ب ئاقارەكێ دی یێ نەباش بچیت.
هەروەسان بەلاڤكرییە، سۆپاسییا یانەیا نەورۆز و پارێزگەها سلێمانیێ دكەین، لێ هوسا دیارە فدراسیۆنا فوتبۆلا ئیراقێ پێ باشتر بوو یاری ل بەغدا بیت داكو بشێن كونترۆلێ ل سەر یاریگەهێ بكەن، یا ژهەمیێ گرنگتر پاراستنا گیانێ پشتەڤانایە و بۆ مە ئەڤ یەكە ژ ئەنجامێ یارییەكێ مەزنترە، هەروەسان لدووڤ ڕاسپاردا فدراسیۆنا فوتبۆلا ئیراقێ باشترە یاری ل یاریگەها شەعب بهێتە كرن ژبۆ بەرژەوەندییا گشتی و مە ژی دڤێت دوور بین ژ هەر ئاریشەكا پشتەڤان بكەڤنێ.
