فێسبووک مەزنترین رێبە بۆ تێکدانا ھەڤبەندیێن ھەڤژینان
ئەڤرۆ:
نڤیسینگەھەکا پارێزەریێ یا بریتان یا بەرنیاس ئاشکرا کر کو ھەر ١ ژ ٧ بریتانیان ھزر د بەردانێ دا دکەت ژ بەر مژوولیا ھەڤژینی ب ھەڤگەھشتنا ھەڤالان ڤە ل سەر فێسبووکی.
ئەڤ ڤەکۆلینا ب سەرپەرشتیا نڤیسینگەھا “سلاتەر وگوردون” یا پارێزەریێ ھاتیە ئەنجامدان دیار کر کو مالپەرێ فێسبووک یێ جڤاکی مەترسیترین ئالاڤە بۆ تێکدانا ھەڤبەندیێن دلداریێ.
“ئەندرۆ نیوبری” سەرۆکێ پشکا قانوونا خێزانی د بەیاننامەکێ دا ل سەر تۆرا ئنترنێتێ دیار کر کو بەری پێنج سالان کێم ناڤێ فێسبووکی د کێشێن بەردانێ دا دھات، بەلێ نوکە گەلەک یا بەربەلاڤە کو ب کارئینانا مالپەرێن جڤاکی خیانەتا ھەڤژینان ئاشکرا دبیت، ناڤبری دیار کر ژی کو مالپەرێن جڤاکی و فێسبووک وەکو کێلگەھا مینانە بۆ ھەڤژینێن نوو.
ل دووڤ ڤان ئەنجامان کو نیڤەکا خەلکی ب نھێنێ سەحدکەنە پەیجێ ھەڤژینی، ھەر ١ ژ ٥ کەسان ل گەل ھەڤژینی ب شەر دچن ژ بەر بەلاڤکرنا بابەتەکی ل سەر پەیجێ وی ل سەر فێسبووکی.
د راپرسینەکا مالپەرێ GeekWire.com دا، ٢٥% ژ ھەڤژینان دیار کریە کو ب کێماسی حەفتیێ جارەکێ ل گەل ھەڤژینێن خوە ب شەر دچن ژ بەر بکارئینانا مالپەرێن جڤاکی، و نێزیکێ ١٧% دیار کر کو رۆژانە ئەو ب شەر دچن ژ بەر دیتنا تشتەکی ل سەر پەیجێ ھەڤژینی.
ھەروەسا ٥٨% ژ وان کەسان ناڤەرۆکا پەیجێ خوە بۆ ھەڤژینا خوە دیار دکەن کو ئەڤە مەزنترین ئەگەر بوو بۆ ب شەر چوون و دوبەرەکیان.
