فێستیڤال نـەیـا بـەروارییانە
ژێگر نەجیب عەبدولرەزاق
چەند تێبینیەك ل سەر فیستەڤالا (بەرهەمێن خۆمالی) ل دەڤەرا بەرواری بالا.
فیستەڤال ئەو چالاكییە یا كو سالانە ل دەمەكێ دیاركری دهێتە ڕێكخستن و گرێدای بابەتێن جودایە (ڕەوشەنبیری، هونەری، وەرزش، خوارن،…). خەلكەك ب مەرەما خۆشییێ و مفاوەرگرتنێ ژ چالاكییێن جۆراو جۆر لێ كۆم ڤەدبیت.
فیستەڤالا بەرهمێن خۆمالی ل دەڤەرا بەرواری بالا، ئێكە ژ ئەڤان جۆرە فیستەڤالا كو ئەڤە بۆ ماوێ سێ سالانە یا بەردەوام و ئەڤ سالە ل ڕێككەفتی (24/10/2025) دەستپێكریە و دێ بۆ ماوێ پێنج ڕۆژان یا بەردەوام بیت. تشتێ سەرنجا من كێشای، شاشیا كەنالێن ڕاگەهاندنێ و مالپەرێن ئەنترنێتێ و خەلكەكی ب گشتییە. ناڤێ فیستەڤالێ ب (فیستەڤالا بەرواریان) ناڤدكەن. ب دیتنا من ئەڤە شاشیەكا مەزنە، ژبەر كو ئەم مەزنی و سنوورێ فیستەڤالێ بەرتەنگ دكەین ب ناڤێ دەڤەرەكا دیاركی یان عەشیرەتەكێ. چونكی فیستەڤال یا هەر كوردەكییە كو پشكدارییێ تێدا بكەت چ ل هەرێمێ یا سەر ئاستێ هەر چار پارچێن كوردستانێ و جهێ فیستەڤالێ دەڤەرا بەرواری بالایە.
بلا هزركرنا مە یا بەرتەنگ نەبیت، پێدڤییە ڕێكخەرێن ئەڤێ فیستەڤالێ د دووربین بن… ئەم هزر د بابەتێن بەرفرهەتردا بكەین و ئەڤێ فیستەڤالێ د چارچووڤەكێ كوردستانی دا ڤەژینین. بلا دویر بیت ژ (موركێ – تابعێ) عەشیرگەریێ یان پارتاتییێ. داكو هەر كەسەك خۆ تێدا ببینت.
مفا و گرنگیێن ئەڤان جۆرە فیستەڤالا د زۆرن؛ ژبلی چێژو خۆشییا كەش و هەوایێ دەڤەرێ و فیستەڤالێ، دڤێت یا پڕی چالاكییێن هونەری و كولتووری بیت، پا پڕی بەرهەمێن خۆمالی یێن سەرتاسەری بیت. فیستەڤالەك بیت پێكڤەژیانا ئول و نەتەوەیان موكمبكەت. ببیتە ئەگەرێ ڤەبوونا دەرگەهێن بازرگانی و پەیوەندییێن جڤاكی د ناڤبەرا هەرچارپارچەیێن كوردستانێ، تێكەلبوون و ئاشنابوونا دەڤەران گرنگە.
ئەڤ جۆرە فیستەڤالە د پیرۆز و پێدڤینە. چونكی نە بتنێ سەما و ستران و خوارن و ڤەخوارنن، بەلكو هەلگرێن گەلەك پەیامانە مینا( پاراستنا ناسناما نەتەوەیی، گەشەبوونا زمانی، پەیوەندییێن جڤاكێ كوردی، بیرئینانا دیرۆك و بەرخودانا نەتەوەیی، نیشاندانا كەلتوورێ مە بۆ جیهانێ، خۆرتبوونا كەرتێ تایبەت و ئابووری، گرنگیدان ب بەرهەمێن خۆمالی).
ل دوماهییێ دەشتخۆشییێ ل ڕێكخەر و پشتەڤان و هاریكارێن ئەڤان جۆرە چالاكیان دكەین، گەلەك ژ ئەڤان تێبینی و تشتێ مە بەحسكری یێ هاتی ئەنجامدان، هیڤیدارین یێن مای ژی كار ل سەر بهێتەكرن. هیڤێیا بەردەوامییێ.
