فەرزاد محەمەد عەلی: باشترین شێوە خولا ئاسیایی ب ڕێڤە دچیت و باوەرنامە ل سەر ئاستێ جیهانی یە
ب پشكدارییا 24 راهێنەرێن پارێزگەها دهۆكێ ئەڤە بۆ ماوەیێ هەشت رۆژە خولەكا تایبەت یا راهێنانێ بۆ ب دەستڤە ئینانا باوەرنامەیا ئاسیایی ژ جورێ سی بەردەوامە، ئەوا ژلایێ فیدراسیۆنا تەپا پێی یا پارێزگەهێ ب هەڤكارییا نوونەراتییا دهۆك یا لژنەیا ئۆلمپی كو ب سەرپەرشتییا لژنەیا تەكنیكی و پێشئێخستنا ئاستێ راهێنەران ل فیدراسیۆنا تەپا پێی یا ئیراقێ ل یاریگەها پیرس هاتییە دانان.
ل دۆر دووماهی زانیاری و پێشهاتەیێن خولێ فەرزاد محەمەد عەلی جێگرێ سەرۆكێ فیدراسیۆنا تەپا پێی یا پارێزگەهێ بۆ رۆژنامەیا ئەڤرۆ گۆت: پشتی تاقیكرن بۆ 33 راهێنەرانێن داخوازییا پشكداریێ كرین، تاقیكرن بۆ وان هاتبوو كرن ژبۆ ژێگرتنا هژمارەیا یاسایی كو 24 راهێنەر بوون ئێك ژ وان راهێنەرا كچە، ل15ێ ڤێ مەهێ دەست ب خولێ هاتیە كرن ل دووڤ بەرنامەیێ دارشتی ژلایێ وانەبێژێ ئاسیایی خسرۆ گۆرەن ب شێوەیێ تیۆری و پراكتیكی دهێتە شرۆڤەكرن، هەروەسان وانەیێن بهێزكرنا شیانی ژلایێ د. ئازاد ئەحمەد مامۆستایێ زانكۆیی و راهێنەرێ جەستەیی هەردیسان سلێمان رەمەزان راهێنەرێ یانەیا دهۆك و خودانێ باوەرنامەیا ئەی پرۆ یا ئاسیایی.
ناڤهاتی گۆت ژی: ئەڤ خولە دێ هەتا 25ێ ڤێ مەهێ یا بەردەوامبیت و گەشبینم راهێنەرێن پشكدار باشترین شێوە یێ مفایی ژێ وەردگرن ژبەركو هەمی گەنجن و خوون گەرمن و حەزا خوە پێشئێخستنێ یا هەیی، ل دووماهیێ پشتی تاقیكرن بۆ دهێنە كرن و ئەنجام دهێنە راگەهاندن ئەڤ باوەرنامەیێن بۆ دهێنە دان نە بتنێ ل سەر ئاستێ ئاسیا بەلكۆ ل سەر ئاستێ جیهانێ ژی یا باوەرپێكرییە و مفایەكێ مەزن ژێ وەرگرن.
