فەرسەت سۆفی: ب تنێ بۆ راکێشانا سەرنجا خەلکی خوە ژ حوکمەتێ ڤەکێشان
ئەڤرۆ نيوز، زنار تۆڤی:
ئەندامەکێ پەرلەمانێ کوردستانێ ل سەر لیستا پارتی دیمۆکراتی کوردستان ل دۆر وان پێشھاتێن نوو یێن ل کوردستانێ روو ددەن بۆ رۆژناما ئەڤرۆ دبێژیت، خوە ڤەکێشانا کۆمەلا ئیسلامی و بزاڤا گۆڕان ژ حوکمەتا ھەرێما کوردستانێ، د دەمەکێ دایە کو سەرۆکێ حوکمەتا ھەرێما کوردستانێ نێچیرڤان بارزانی داخواز ژ کۆمسیۆنا ھەلبژاتنان کریە کو بەرھەڤیێ بۆ ئەنجامدانا ھەلبژارتنان ل ھەرێما کوردستانێ بکەن، وەسا دیارکریە کو دەمێ ھەلبژارتنان ژ سێ ھەیڤێن دیتر نەبوریت، لەورا خوە ڤەکێشانا وان ھەر دو حزبان ژ حوکمەتێ چو واتایا خوە نینە.
فەرسەت سۆفی گوت: ب تنێ مەرەما وان ھەر دو حزبان ئەوە کو سەرنجا خەلکێ بۆ خوە رابکێشن د ھەلبژارتنان دا، لێ خەلکێ کوردستانێ گەلەک یێ ھشیارە و باش تێ دگەھیت ژی،کو خوە ڤەکێشانا وان نە ژبۆ خەلکێ یە، ھەروەسا نە ژبۆ ھندێ ژی یە کو ئەو حوکمەتا نوکە یا خرابە، بەلکو ب تنێ بۆ دەست خستنا ھندەک مەرەمێن حزبی و سیاسینە و مەرەما وان ئەوە کو خەلکێ کوردستانێ د سەر داببەن و عاتیفا خەلکێ بۆ خوە رابکێشن، چونکی دەمێ ل وەلاتەکێ قەیرانەک دروست دبیت، باشترین رێیا چارەسەریێ ڤەگەریانە بۆ دەنگێ مللەتی و دەستھەلاتا مللەتێ کوردستانێ، ھەروەسا سەرۆکێ حوکمەتێ ژی داخواز کریە کو ڤەگەرینە ڤە بۆ دەستھەلاتا گەلێ کوردستانێ،لەورا ڤێ چەندێ پێدڤی ب خوە ڤەکێشانێ و حوکمەتا دەمکی نینە.
ئەندامێ پەرلەمانێ کوردستانێ خوەیاکر، نوکە ب تنێ ئێک بژاردە ل پبَشیا مە ھەیە دڤی رەوشا دژوار دا، ئەو ژی پێدڤیە بێھنا خەلکێ مە یا فرەە بیت و ھەموو خەلکێ مە خوە بەرھەڤ بکەت بۆ ئەنجامدانا ھەلبژارتنان، ھەروەسا نوکە کۆمسیۆنا ھەلبژارتنان ل ھەرێما کوردستانێ مژۆلی پاقژکرنا لیستێن دەنگدەرانە، دیسا ھەکە ل قۆناغێن بۆری کۆمەلا ئیسلامی یان ژی بزاڤا گۆڕان شیابن خەلکێ مە د سەردا ببەن، لێ نوکە خەلکێ مە گەلەک ژ وان ھشیارترە، چونکی نوکە سێ ھەیڤ ل پێشیا خەلکێ ماینە بۆ ئەنجامدانا ھەلبژارتنان ل ھەرێما کوردستانێ، لەورا ئێدی ئەو ھەردو حزب نەشێن سەرنجا خەلکێ بۆ ھەلمەتا ھەلبژاتنان رابکێشن، چونکی ھەکە خەلکێ کوردستانێ ئەو دەستھەلاتە نەڤێت یان ژی ئەو قەیرانا ھەیی نەشێن پێ ئیدارە بکەن، بلا مللەتێ مە ب خوە بریارێ بدەت، وان کی دڤێت بلا بۆ خوە ب ھەلبژێرن.
